ନାଗାଲ୍ୟାଣ୍ଡ (ଏଟିଆର ବ୍ୟୁରୋ ) ; ବରିଷ୍ଠ ଆଇପିଏସ ଅଧିକାରୀଙ୍କ ଘରୁ ବ୍ରାଉନସୁଗାର ଜବତ । ପାଖାପାଖି ୬.୯ କେଜି ଓଜନର ବ୍ରାଉନ ସୁଗାର ଦୁଇଜଣ ବ୍ୟକ୍ତିଙ୍କ ଠାରୁ ଜବତ କରି ନିଜ ଘରକୁ ନେଇଯାଇଥିଲେ ଆଇପିଏସ ଅଧିକାରୀ ଜଣକ । ଏଭଳି ଘଟଣା ଜଣାପଡିବା ପରେ ଉଚ୍ଚ ପଦସ୍ଥ ଅଧିକାରୀଙ୍କ ଦ୍ୱାରା ଚାକିରୀରୁ ନିଲମ୍ବିତ ହୋଇଛନ୍ତି ବରିଷ୍ଠ ଅଧିକାରୀ । ନିଲମ୍ବିତ ଅଧିକାରୀଙ୍କ ନାମ ରିଚାର୍ଡ ୟିମଟୋ ବୋଲି ଜଣାପଡିଛି । ସେ ପୂର୍ବରୁ ସିଆଇଡିରେ ଆଇଜିପି ଭାବେ କାର୍ଯ୍ୟରତ ଥିଲେ ।
ସୂଚନା ଅନୁସାରେ , ନାଗାଲ୍ୟାଣ୍ଡରେ ଦୁଇଜଣ ବ୍ୟକ୍ତି ଏକ କାର ଯୋଗେ ବାଉନସୁଗାର ଚାଲାଣ କରୁଥିବାର ଖବର ପାଇବା ପରେ ସେମାନଙ୍କ ଉପରେ ଚଢାଉ ହୋଇଥିଲା । ଏହି ଚଢାଉରେ ସମସ୍ତ ବ୍ରାଉନସୁଗାରକୁ ଜବତ କରାଯିବା ପରେ କିଛି ଅଧିକାରୀଙ୍କ ସତାସୁତୁରାରେ ଚାଲାଣକାରୀକୁ ଛାଡିଦିଆଯାଇଥିଲା । ତେବେ ଏହାପରେ ବ୍ରାଉନସୁଗାର କୁଆଡେ ଗାୟବ ହୋଇଯାଇଥିଲା । ଏ ଘଟଣା ପରେ ଉଚ୍ଚ ପଦସ୍ଥ ଅଧିକାରୀ ଖବର ପାଇ ରିଚାର୍ଡଙ୍କୁ କାରଣ ଦର୍ଶାଅ ନୋଟିସ ଜାରି କରିଥିଲେ । ତେବେ ରିଚାର୍ଡ ସେହି ବ୍ରାଉନସୁଗାରଙ୍କୁ ଜବତ କରି ଘରକୁ ନେଇଯାଇଥିବା ଜଣାଇଥିଲେ । ସେପଟେ ରିଚାର୍ଡଙ୍କ ଘରୁ ମୋଟ ୬.୯ କିଲୋ ଓଜନର ବ୍ରାଉନସୁଗାର ଜବତ କରାଯିବା ସହ ତାଙ୍କୁ ନିଲମ୍ବନ କରାଯାଇଛି ।
