ଭୁବନେଶ୍ୱର (ଏଟିଆର ବ୍ୟୁରୋ ) ; ଦୀର୍ଘ ୪୨ ଦିନ ପରେ ମୁକୁଳିଲା ବୈଜୟନ୍ତଙ୍କ ହେଲିକପ୍ଟର । ଡିଜିସିଏର କ୍ଲିନଚିଟ ପରେ ପୂର୍ବତନ ସାଂସଦ ବୈଜୟନ୍ତ ପଣ୍ଡାଙ୍କ ୨ ଟି ହେଲିକପ୍ଟରକୁ ଖୋଲିଲା ପୁରୀ ପୋଲିସ । ଦିର୍ଘ ୪୨ ଦିନ ଧରି ଇମ୍ଫାର ୩ ଟି ହେଲିୁକପ୍ଟରକୁ ପୁରୀ ପୋଲିସ ଜବତ କରିଥିଲା । ତେବେ ଆଜି ଜଣେ ଏସଡିପିଓ ଓ ମେରାଇନ ଥାନା ଆଇଆଇସିଙ୍କ ଉପସ୍ଥିତିରେ ହ୍ୟାଙ୍ଗରକୁ ଖୋଲାଯାଇଛି । ହେଲେ ଆଉ ଏକ ହେଲିକପ୍ଟରକୁ ପୁଣି ସିଲ କରିଛି ପୂରୀ ପୋଲିସ ।
ସୂଚନା ଯୋଗ୍ୟ , ଚିଲିକା ଉପରେ ବେଆଇନ ଭାବେ ହେଲିକପ୍ଟର ଉଡାଣକୁ ନେଇ ଗତ ମାସ ୧୭ ତାରିଖରେ ଭୁବନେଶ୍ୱର ବିମାନ ବନ୍ଦରରେ ଥିବା ଇମ୍ଫାର ହ୍ୟାଙ୍ଗରକୁ ପୁରୀ ପୋଲିସ ଜବତ କରିଥିଲା ଓ ଚିଲିକା ଉପରେ ବୈଜୟନ୍ତଙ୍କ ହେଲିକପ୍ଟର ଉଡିଛି କି ନାହିଁ ସେନେଇ ପୁରୀ ପୋଲିସ ଡିଜିସିଏକୁ ରିପୋର୍ଟ ମାଗିଥିଲା ।
ଏହାପରେ ଗତ ୨୫ ତାରିଖ ଦିନ ଡିଜିସିଏ ନିଜ ରିପୋର୍ଟରେ ବୈଜୟନ୍ତଙ୍କୁ କ୍ଲିନଚିଟ ଦେଇଥିଲା । ବୈଜୟନ୍ତଙ୍କ ହେଲିକପ୍ଟର ଉଡାଣ ଦିନ ଡିଜିସିଏର କୌଣସି ନିୟମ ଭାଙ୍ଗିନଥିବା ରିପୋର୍ଟରେ ପ୍ରକାଶ ପାଇବା ପରେ ଆଜି ଭୁବନେଶ୍ୱର ବିମାନ ବନ୍ଦରରେ ଥିବା ହ୍ୟାଙ୍ଗରକୁ ଖୋଲିଛି ପୁରୀ ପୋଲିସ । ତେବେ ଅଭିଯୋଗ ଅନୁଯାଇ ହେଲିକପ୍ଟରଟି କେତେ ଉଚ୍ଚତାରେ ଉଡିଥିଲା ସେନେଇ ତଥ୍ୟ ମାଗିବା ସହ ଆଉ ଏକ ହେଲିକପ୍ଟରକୁ ପୁରୀ ପୋଲିସ ପକ୍ଷରୁ ପୁଣି ସିଲ କରାଯାଇଥିବା ଜଣାପଡିଛି ।
