ସୁନ୍ଦରଗଡ (ଏଟିଆର ବ୍ୟୁରୋ): ଲେଫ୍ରିପଡାର ତେଲନହିଡି ଗାଁ ନିକଟରେ ପୁଣି ଏକ ସଡକଦୁର୍ଘଟଣା ଖବର ସାମ୍ନାକୁ ଆସିଛି । ଏମିତି ବି ମୃତ୍ୟୁ ଆସେ । ରାସ୍ତାକଡରେ ଛିଡା ହୋଇଥିବା ୫ ଜଣ ଯାତ୍ରୀଙ୍କୁ ଏକ ବୋଲେର ଧକ୍କା ଦେଇ ଚମ୍ପଟ ମାରିଛି । ଏଥିରେ ୩ ଜଣଙ୍କର ମୃତ୍ୟୁ ହୋଇଥିବା ବେଳେ ୨ ଜଣ ଗୁରୁତର ଭାବେ ଆହତ ହୋଇଛନ୍ତି । ଆହତଙ୍କୁ ଚିକିତ୍ସା କରିବା ଲାଗି ଜିଲ୍ଲା ମୁ୍ଖ୍ୟ ଡାକ୍ତରଖାନାରେ ଭର୍ତ୍ତି କରାଯାଇଛି । ମୃତକଙ୍କ ମଧ୍ୟରେ ୨ ଜଣ ମହିଳା ଏବଂ ଜଣେ ପୁରୁଷ ଥିବା ଜଣା ପଡିଛି । ସେମାନେ ହେଉଛନ୍ତି କୋରେଇ ଗାଁର ମାଇକେଲ, ଏଲିଜାବେଥ୍ ଲାକ୍ରା ଏବଂ ଫ୍ଲୋରା ଏକ୍କା ।
ଗତକାଲି ସନ୍ଧ୍ୟାରେ କୋରେଇ ଗାଁର ଏହି ୫ ଜଣ ବ୍ୟକ୍ତି ତେଲନହିଡି ଗାଁର ଏକ ନିର୍ବନ୍ଧରେ ସାମିଲ ହୋଇ ଘରକୁ ଫେରିବା ପାଇଁ ରାସ୍ତା କଡରେ ଛିଡା ହୋଇଥିଲେ । ମାତ୍ର ଏକ ବୋଲେର ଡ୍ରାଇଭର ବେପରୁଆ ଭାବେ ଗାଡି ଚଲାଇ ଆସି ସେମାନଙ୍କୁ ଧକ୍କା ଦେଇ ଫେରାର ହୋଇଯାଇଥିଲା । ଘଟଣାସ୍ଥଳରେ ତିନିଜଣଙ୍କର ମୃତ୍ୟୁ ଘଟିଥିଲା । ମାତ୍ର ଏଯାବତ୍ ବୋଲେରର କୌଣସି ଠିକଣା ଜଣାପଡିନାହିଁ । ଘଟଣାରେ ପୋଲିସ୍ ପହଁଚି ତଦନ୍ତ ଆରମ୍ଭ କରିଛି ।
