ନୟାଗଡ (ଏଟିଆର ବ୍ୟୁରୋ); ନଳକୂପରେ ପିଟି ହେଲା ବାଇକ । ଘଟଣାସ୍ଥଳରେ ଜଣଙ୍କର ମୃତ୍ୟୁ ହୋଇଥିବା ବେଳେ ଆଉ ଜଣେ ଗୁରୁତର ଆହତ ହୋଇଛନ୍ତି । ତେବେ ଏଭଳି ଏକ ମର୍ମନ୍ତୁଦ ସଡକ ଦୁର୍ଘଟଣା ଘଟିଛି ନୟାଗଡ ଜିଲ୍ଲା ନୂଆଗାଁ ବ୍ଳକ ଅନ୍ତର୍ଗତ ଭାଟସାହି ଅଞ୍ଚଳରେ । ପୋଲିସ ଖବର ପାଇବା ପରେ ମୃତ ଦେହକୁ ଉଦ୍ଧାର କରି ବ୍ୟବଛେଦ ପାଇଁ ପଠାଇ ଦେଇଛି । ସେପଟେ ଗୁରୁତର ଆହତଙ୍କ ଭୁବନେଶ୍ୱର ଏମ୍ସ ହସ୍ପିଟାଲରେ ଭର୍ତ୍ତି କରାଯାଇଛି । ଗୁରୁତର ଆହତ ହେଲେ ଗୋପିନାଥ ସ୍ୱାଇଁ । ତାଙ୍କ ଘର ନୂଆଗାଁ ବ୍ଳକ ଉଦୟପୁର ପଞ୍ଚାୟତ ଅନ୍ତର୍ଗତ ଜିଗିନିପଡା ଗ୍ରାମରେ ।
ରିପୋର୍ଟ ମୁତାବକ ଗୋପି ତାଙ୍କ ମାମୁଁଙ୍କ ପୁଅ ସହ ମାଉସୀ ଘରକୁ ବାହାଡଝୋଲା ଯାଉଥିଲେ । ତେବେ ବାହାଡଝୋଲା ରାସ୍ତା ଭାଟସାହି ଠାରେ ବିପରୀତ ଦିଗରୁ ଅନ୍ୟ ଏକ ବଡ ଗାଡି ଆସିବାରୁ ଗାଡି ଚଳାଉଥିବା ଗୋପି ଭାରସାମ୍ୟ ହରାଇ ରାସ୍ତା କଡରେ ଥିବା ନଳକୂପରେ ମାଡ କରିଥିଲେ । ଘଟଣାସ୍ଥଳରେ ତାଙ୍କ ମାମୁଁ ପୁଅ ଭାଇଙ୍କର ମୃତ୍ୟୁ ହୋଇଥିଲା । ସ୍ଥାନୀୟ ଲୋକ ପୋଲିସକୁ ଖବର ଦେବା ପରେ ଗୋପୀଙ୍କୁ ଉଦ୍ଧାର କରି ନୟାଗଡ ଜିଲ୍ଲା ମୁଖ୍ୟ ଚିକିତ୍ସାଳୟକୁ ପଠାଇଥିଲେ । ଅବସ୍ଥା ସଙ୍କଟାପର୍ଣ୍ଣ ହେବାରୁ ତାଙ୍କୁ ଭୁବନେଶ୍ୱର ଏମ୍ସ ହସ୍ପିଟାଲକୁ ସ୍ଥାନାନ୍ତରିତ କରାଯାଇଛି ।
