ଖୋର୍ଦ୍ଧା (ଏଟିଆର ବ୍ୟୁରୋ); ଦିନ ଦ୍ୱିପ୍ରହରେ ଯୁବକଙ୍କୁ ହାଣି ପକାଇଲେ ଦୁର୍ବୃତ୍ତ । ଘଟଣାସ୍ଥଳରେ ହିଁ ଯୁବକଙ୍କ ମୃତ୍ୟୁ ହୋଇଛି । ପୋଲିସ ଖବର ପାଇବା ପରେ ମୃତ ଦେହକୁ ଉଦ୍ଧାର କରି ବ୍ୟବଛେଦ ପାଇଁ ପଠାଇ ଦେଇଛି । ମୃତକ ହେଲେ ଚିନ୍ମୟ ସାହୁ । ତାଙ୍କ ଘର ଖୋର୍ଦ୍ଧା ଜିଲ୍ଲା ବେଗୁନିଆ ଅନ୍ତର୍ଗତ ଦେଉଳି ଗ୍ରାମରେ । ତେବେ ଚିନ୍ମୟଙ୍କୁ କିଏ ମାରିଛି ତାହା ଜଣା ପଡିନାହିଁ । କେଉଁ କାରଣରୁ ମଧ୍ୟ ଏହି ହତ୍ୟା ହୋଇଛି ତାହା ସ୍ପଷ୍ଠ ହୋଇନାହିଁ । ଖବର ପାଇ ବେଗୁନିଆ ପୋଲିସ ଘଟଣାର ତଦନ୍ତ ଆରମ୍ଭ କରିଛି ।
ମିଳିଥିବା ସୂଚନା ମୁତାବକ ଆଜି ଦିନ ୧୨.୩୦ ବେଳେ ଚିନ୍ମୟ ଯାଉଥିବା ବେଳେ ବେଗୁନିଆ ଥାନା ଏବଂ ଦେଉଳି ଗାଁ ମଧ୍ୟରେ ଥିବା ରାସ୍ତା ଉପରେ ଗୋଡାଇ ଗୋଡାଇ ହାଣିବା ପରେ ଫେରାର ହୋଇ ଯାଇଥିଲେ ଦୁର୍ବୃତ୍ତ । ଗାଁ ଲୋକ ଦେଖିଥିଲେ ମଧ୍ୟ କେହି କିଛି ସାହାର୍ଯ୍ୟ କରିବା ପୂର୍ବରୁ ଚିନ୍ମୟଙ୍କୁ ହାଣି ଫେରାର ହୋଇ ଯାଇଥିଲେ ଦୁର୍ବୃତ୍ତ । ତେବେ ଖରବ ପାଇବା ପରେ ବେଗୁନିଆ ପୋଲିସ ଆସି ତାଙ୍କ ମୃତ ଦେହକୁ ଉଦ୍ଧାର କରି ବ୍ୟବଛେଦ ପାଇଁ ପଠାଇ ଦେଇଛି । ସେପଟେ ଚିନ୍ମୟଙ୍କ ମୃତ୍ୟୁ ପରେ ସ୍ଥାନୀୟ ଅଞ୍ଚଳରେ ଶୋକର ଛାୟା ଖେଳି ଯାଇଛି ।
ସୂଚନା ଯୋଗ୍ୟ ଆସନ୍ତା ୨୧ ତାରିଖରେ ଚିନ୍ମୟଙ୍କର ବିବାହ ହେବାର ଥିଲା । ବାହାଘର ପାଇଁ ସମସ୍ତ ସଜବାଜ ଏବଂ ସବୁ ସାମଗ୍ରୀ କିଣାକିଣି ମଧ୍ୟ ସରିଥିଲା । ମାତ୍ର ପୁଅର ମୃତ୍ୟୁ ହେବା ପରେ ବାପା ମା ଦୁଃଖରେ ଭାଙ୍ଗି ପଡିଛନ୍ତି । ସେପଟେ ଚିନ୍ମୟଙ୍କ ମୃତ୍ୟୁରେ ଗାଁ ଲୋକ ମଧ୍ୟ ମ୍ରିୟମାଣ ହୋଇ ପଡିଛନ୍ତି । ତେବେ ତାଙ୍କ ମୃତ୍ୟୁକୁ ନେଇ ବିଭିନ୍ନ ପ୍ରକାର ଗୁଜବ ଉଠୁଛି
