କଟକ (ଏଟିଆର ବ୍ୟୁରୋ); ବିଜେଡିରେ ଟିକେଟ ନମିଳିବାରୁ ଦଳରେ କନ୍ଦଳ କୁହୁଳୁଥିବା ବେଳେ ଆଜି ଦଳର ପ୍ରଚାର ଗାଡିରେ ନିଆଁ ଲାଗିଯାଇଛି । ହୁ ହୁ ହୋଇ ଜଳିଯାଇଛି ଗାଡିଟି । କିନ୍ତୁ ଭଗବାନଙ୍କ ଦୟାରୁ କାହାର କିଛି କ୍ଷତି ହୋଇନାହିଁ । ଅଳ୍ପକେ ବର୍ତ୍ତିଛନ୍ତି ଡ୍ରାଇଭର । ଖବର ପାଇବା ପରେ ଘଟଣାସ୍ଥଳରେ ଦମକଳ ବାହିନୀ ପହଁଞ୍ଚି ନିଆଁକୁ ଆୟତ କରିଥିଲା । ତେବେ ଗାଡିରେ ନିଆଁ ଲାଗିଥିବା ଦେଖିବା ପରେ ଲୋକ ଭୟଭୀତ ହୋଇଯାଇଥିଲେ ।
ସୋମବାର ଅପରାହ୍ନରେ କଟକ ଜିଲ୍ଲା ଆଠଗଡ ୫୫ ନମ୍ବର ଜାତୀୟ ରାଜପଥରେ ପ୍ରଚାର ପାଇଁ ବାହାରିଥିବା ବିଜେଡି ଗାଡିରେ ନିଆଁ ଲାଗିଯାଇଥିଲା । ସ୍ଥାନୀୟ ଲୋକ ଏହା ଦେଖିବା ପରେ ଅଗ୍ନିଶମ ବିଭାଗକୁ ଖବର ଦେଇଥିଲେ । ଦମକଳ ବାହିନୀ ଘଟଣାସ୍ଥଳରେ ପହଁଞ୍ଚି ନିଆଁକୁ ଆୟତ କରିଥିଲେ । ତେବେ ନିର୍ବାଚନ ଆରମ୍ଭରୁ ପ୍ରଚାର ଗାଡିରେ ନିଆଁ ଲାଗିବା ଅଶୁଭ ସଂଙ୍କେତ ବୋଲି ରାଜନୈତିକ ମହଲରେ ଚର୍ଚ୍ଚା ହେଉଛି । ଦଳରେ ଟିକେଟକୁ ନେଇ ନିଆଁ କୁହୁଳୁଥିବା ବେଳେ ଗାଡିରେ ନିଆଁ ଲାଗିବା ରାଜନୈତିକ ପାଣିପାଗକୁ ଚହଲାଇ ଦେଇଛି ।
