କେନ୍ଦ୍ରାପଡା ( ଏଟିଆର ବ୍ୟୁରୋ): ନିଆଁ ଲାଗି ଜଳିଗଲା ୪ ବଖରା । ସର୍ଟ ସର୍କିଟରୁ ନିଆଁ ଲାଗିଥିବା ସନ୍ଦେହ । ଏମିତି ଏକ ଅଭାବନୀୟ ଘଟଣା ଘଟିଛି କେନ୍ଦ୍ରାପଡା ବଗଡା ଡିହ ସାହିରେ । ସୂଚନା ଅନୁସାରେ ଆଜି ଦିନ ସାଢେ ଦୁଇଟା ବେଳେ ଉକ୍ତ ଗ୍ରାମରେ ଅନାମ ଜେନାଙ୍କ ଘରେ ହଠାତ ନିଆଁ ଲାଗି ଯାଇଥିଲା । କେହି କିଛି ଭାବିବା ପୂର୍ବରୁ ନିଆଁ ଦେଖାଇଥିଲା ତାର କରାଳ ରୂପ ।
ଆଖି ପିଛୁଳାକେ ନିଆଁ ଚାରି ଆଡେ ବ୍ୟାପି ଜାଇଥିଲା ଏମିତିକି ପଡୋଶୀ ମାନେ ଆସି ନିଆଁକୁ ଆୟତ୍ତ କରିବା ପୂର୍ବରୁ ନିଆଁ ପାଖ ଘର ଉତ୍ତମ ଜେନାଙ୍କ ଚାଳ ଛପର ଘରେ ଲାଗି ଯାଇଥିଲା । ଯେତେ ଚେଷ୍ଟା କଲେ ମଧ୍ୟ ନିଆଁକୁ ଆୟତ୍ତ କରି ହୋଇନଥିଲା । ଶେଷରେ ଅନାମ ଜେନାଙ୍କ ଘରେ ଥିବା ଗ୍ୟାସ ସିଲିଣ୍ଡରରେ ନିଆଁ ଲାଗିଯାଇଥିଲା । ଏଲପିଜି ଗ୍ୟାସ ସିଲିଣ୍ଡର ଫାଟିବା ପରେ ନିଆଁ ଚାରି ଆଡକୁ ଛିଟିକି ପଡିଥିଲା ।
ପାଖରେ ଥିବା କିଛି ଜିନିଷରେ ନିଆଁ ଲାଗିବାରୁ ଅଳ୍ପକେ ବର୍ତ୍ତି ଯାଇଛି । ତେବେ ଘଟଣା ବିଷୟରେ ଅଗ୍ନିଶମ ବିଭାଗକୁ ଖବର ମିଳିବା ପରେ କେନ୍ଦ୍ରପଡା ଅଗ୍ନିଶମ ବିଭାଗ ଘଟଣା ସ୍ଥଳରେ ପହଞ୍ଚି ନିଆଁକୁ ଆୟତ୍ତ କରିଥିଲେ । ଅଗ୍ନି କାଣ୍ଡରେ ଦୁଇ ପରିବାରର ୪ ବଖରା ଘର ସମ୍ପୂର୍ଣ୍ଣ ପୋଡି ନଷ୍ଟ ହୋଇଯାଇଛି । ବର୍ତ୍ତମାନ ପର୍ଯ୍ୟନ୍ତ ଅଗ୍ନିଶମ ବିଭାଗ ସେଠାରେ ଉପସ୍ଥିତ ରହିଛନ୍ତି ।
