କଳାହାଣ୍ଡି ( ଏଟିଆର ବ୍ୟୁରୋ); ନାବାଳିକାକୁ ଝୁଣିଦେଲା କୁକୁର । ଗ୍ରାମବାସୀ କଲେ କୁକୁର ମୁହଁରୁ ଉଦ୍ଧାର । ନାବାଳିକା ଗୁତ୍ତର ଅବସ୍ଥାରେ ଡାକ୍ତରଖାନାରେ ଭର୍ତ୍ତି । ଏମିତିକା ଏକ ଲୋମଟାଙ୍କୁରା ଦୃଶ୍ୟ ଦେଖିବାକୁ ମିଳିଛି କଳାହାଣ୍ଡି ଜିଲ୍ଲା ପରଙ୍ଗ ପଞ୍ଚାୟତ ଖଇରପଦ ଗାଁରେ । ସୂଚନା ଅନୁସାରେ କୁକୁରଙ୍କ ଶିକାର ହୋଇଥିବା ନାବାଳିକା ଜଣଙ୍କ ଆଜି ସକାଳେ ପୋଖରୀକୁ ଶୌଚ ହେବା ପାଇଁ ଯାଇଥିବା ବେଳେ ସେଠାରେ ଆଠ ଦଶଟି ବୁଲା କୁକୁର ନବାଳିକାକୁ କାମୁଡିବାକୁ ଗୋଡାଇଥିଲେ ।
ନାବାଳିକା ଜଣଙ୍କ ସେଠାରୁ ଦୌଡି ଚାଲିଯିବାକୁ ଚେଷ୍ଟା କରିବା ବେଳେ ସଂଘବଦ୍ଧ ଭାବେ କୁକୁର ସବୁ ନାବାଳିକା ଉପରକୁ ଆକ୍ରମଣ କରିଥିଲେ । କୁକୁର ମାନେ ଏତେ ହିଂସ୍ର ହୋଇ ଉଠିଥିଲେ ଯେ ଏକାବେଳେ ସମସ୍ତେ ନାବାଳିକା ଶରୀର ବିଭିନ୍ନ ଅଂଶକୁ କାମୁଡି ପକାଇଥିଲେ । ନାବାଳିକାର ଚିକ୍ରାର ଶୁଣି ଗ୍ରାମର କିଛି ଲୋକ ଦୌଡାଦୌଡି ହୋଇ ଆସି ନାବାଳିକାକୁ କୁକୁର କବଳରୁ ଉଦ୍ଧାର କରିବା ସହିତ ତୁରନ୍ତ ଧର୍ମଗଡ ଡାକ୍ତରଖାନାରେ ଭର୍ତ୍ତି କରିଥିଲେ ।
ନାବାଳିକାର ଅବସ୍ଥା ଏବେବି ଗୁରୁତର ଅଛି । କୁକୁରଙ୍କ ଆତଙ୍କ ପୂର୍ବରୁ ଗତ ୧ ତାରିଖରେ ଜିଲ୍ଲାରେ ଦେଖିବାକୁ ମିଳିଥିଲା । ଯାହାର ଶୀକାର ହୋଇଥିଲେ ଜଣେ ବୃଦ୍ଧା । ସେହିଭଳି ଦଳେ ମେଣ୍ଢାଙ୍କୁ ମଧ୍ୟ କୁକୁର ମାନେ ମାରି ଦେଇଥିଲେ । ତେବେ ଏବେ ଘଟଣାକୁ ନେଇ ଗ୍ରାମରେ ତିବ୍ର ଅସନ୍ତୋଷ ଦେଖା ଦେଇଛି । ପ୍ରଶାସନ ପକ୍ଷରୁ ଏନେଇ କୌଣସି ପଦକ୍ଷେପ ଗ୍ରହଣ କରାଯିବାକୁ ସାଧାରଣରେ ଦାବି ହୋଇଛି ।
