ନୟାଗଡ (ଏଟିଆର ବ୍ୟୁରୋ); ଘରକୁ ଫେରୁଥିଲେ ଦୁଇ ଭାଇ । ଚଢ଼ିଗଲା ଗ୍ୟାସ ବୋଝେଇ ଟ୍ୟାଙ୍କର । ଘଟଣାସ୍ଥଳରେ ହିଁ ଚାଲିଗଲା ଦୁଇ ଭାଇଙ୍କ ଜୀବନ । ନୟାଗଡ ଜିଲ୍ଲା ନୂଆଗାଁ ଥାନା ଲୁଣିସରା ଘଟିଛି ଏଭଳି ଦୁଃଖଦ ଘଟଣା । ମୃତକଙ୍କ ପରିବାରକୁ କ୍ଷତି ପୂରଣ ଦାବି କରି ୫୭ ନମ୍ବର ଜାତୀୟ ରାଜପଥ ବନ୍ଦ କରିଛନ୍ତି ସ୍ଥାନୀୟ ଲୋକ । ପୋଲିସ ଘଟଣାସ୍ଥଳରେ ପହଁଞ୍ଚି ଉତ୍ୟକ୍ତ ଲୋକଙ୍କୁ ବୁଝା ଶୁଝା କରୁଛି । ମୃତକ ଦୁଇ ଭାଇ ହେଲେ ଗଣେଷ ନାୟକ ଏବଂ ରମେଶ ନାୟକ । ମୃତକଙ୍କ ଘର ସୋରଡା ଗାଁରେ ।
କୌଣସି କାମରେ ରମେଶ ଏବଂ ଗଣେଷ ପାଖ ଲଣିସରା ଗାଁକୁ ଯାଇଥିଲେ । କାମ ସାରିବା ପରେ ଦୁଇ ଭାଇ ଖୁସିରେ କଥା ହୋଇ ଘରକୁ ଫେରୁଥିଲେ । ତେବେ ସେମାନଙ୍କ ଖୁସିରେ ଯେମିତି ଲାଗି ଯାଇଥିଲା କାହା ନଜର । ଦଶପଲ୍ଲା ପଟୁ ଆସୁଥିବା ଏକ ଗ୍ୟାସ ବୋଝେଇ ଟ୍ୟାଙ୍କର ସେମାନଙ୍କ ଉପରେ ଚଢ଼ି ଯାଇଥିଲା । ଘଟଣାସ୍ଥଳରେ ହିଁ ଦୁଇ ଭାଇଙ୍କ ଜୀବନ ଯାଇଥିଲା ।
ସ୍ଥାନୀୟ ଲୋକ ଦୁଇ ଭାଇଙ୍କ ଶବକୁ ରାସ୍ତାରେ ରଖି ରାଜପଥ ବନ୍ଦ କରିଥିଲେ । ଉଭୟ ପାଶ୍ୱରେ ଗାଡି ଲମ୍ବି ଯାଇଥିଲା । ନୂଆଗାଁ ପୋଲିସ ଖବର ପାଇବା ପରେ ଘଟଣାସ୍ଥଳରେ ପହଁଞ୍ଚି ଉତ୍ୟକ୍ତ ଲୋକଙ୍କୁ ବୁଝା ଶୁଝା କରୁଛି । ମୃତକଙ୍କ ପରିବାରକୁ କ୍ଷତି ପୂରଣ ଦାବି କରିଛନ୍ତି ଲୋକ । ଅକାଳରେ ଦୁଇ ଭାଇଙ୍କ ଜୀବନ ଯାଇଥିବାରୁ ପରିବାର ଲୋକ ଦୁଃଖରେ ଭାଙ୍ଗି ପଡିଛନ୍ତି ।
