କେନ୍ଦ୍ରାପଡା ( ଏଟିଆର ବ୍ୟୁରୋ) : ସ୍ଥଗିତ ଥିବା ପାଟକୁରା ବିଧାନସଭା ଆସନ ପାଇଁ ତିନି ପ୍ରମୁଖ ଦଳ ସେମାନଙ୍କ ପ୍ରଚାର ଆରମ୍ଭ କରିଛନ୍ତି । ଏହି ଅବସରରେ ପାଟକୁରାରେ ବିଜେପି ପ୍ରାର୍ଥୀ ବିଜୟ ମହାପାତ୍ରଙ୍କ ପାଇଁ ରୋଡ ସୋ କରିଛନ୍ତି ଭୁବନେଶ୍ୱର ସାଂସଦ ଅପରାଜିତା ଷଡଙ୍ଗୀ । ନିର୍ବାଚନ ତାରିଖ ଏପର୍ଯ୍ୟନ୍ତ ଘୋଷଣା ହୋଇ ନଥିଲେ ସୁଦ୍ଧା ବିଜେଡି ବିଜେପି ସେମାନଙ୍କ କର୍ମୀ ସମ୍ମିଳନୀ ଆରମ୍ଭ କରିଛନ୍ତି । ଏହି ଅବସରରେ ଆଜି ବିଜୟ ମହାପାତ୍ର ଅପରାଜିତାଙ୍କ ସହିତ ଡେରାବିଶ ବ୍ଲକ ଚାନ୍ଦୋଳ ବଜାରରେ ଏକ ବାଇକ ଶୋଭାଯାତ୍ରା କରିଛନ୍ତି ।
ସେଠାରେ ଶହଶହ ମହିଳା ଅପରାଜିତାଙ୍କୁ ରାସ୍ତାରେ ସ୍ୱାଗତ କରୁଥିବା ଦେଖିବାକୁ ମିଳିଛି । ଯାହାକୁ ନେଇ ଏବେ କେନ୍ଦ୍ରାପଡାରେ ଚର୍ଚ୍ଚା ଜୋର ଧରିଛି । ପାଟକୁରାରେ ଅପରାଜିତାଙ୍କ ଯାଦୁ କାମ କରିବ କି ନାହିଁ ତାକୁ ନେଇ ଆରମ୍ଭ ହୋଇ ଯାଇଛି ଅଙ୍କକଷା । ଅନ୍ୟପକ୍ଷେ ବିଜେଡି ମଧ୍ୟ ମଇଦାନକୁ ଓହ୍ଲାଇବା ପାଇଁ କସରତ ଆରମ୍ଭ କରିଛି । ବିଜେଡିର ବହୁ ହେବିୱେଟ ନେତା ଏବେ ପାଟକୁରାରେ ଡେରା ପକାଇଛନ୍ତି ।
ବିଜେଡି ପୂର୍ବତନ ବିଧାୟକ ସ୍ୱର୍ଗତ ବେଦ ପ୍ରକାଶ ଅଗ୍ରୱାଲଙ୍କ ପତ୍ନୀ ସାବିତ୍ରୀ ଅଗ୍ରୱାଲ ନିଜ ସ୍ୱାମୀଙ୍କ ପ୍ରତି ଥିବା ଲୋକମାନଙ୍କ ଭଲ ପାଇବାକୁ ପାଥେୟ କରି ନିର୍ବାଚନ ବୈତରଣୀ ପାର ହେବାକୁ ଆଶା ରଖିଛନ୍ତି । ସେହିଭଳି ବିଜୟ ମହାପାତ୍ର ରାଜ୍ୟ ସରକାରଙ୍କ ବିଫଳତା ଓ ମୋଦି ସରକାରଙ୍କ ସଫଳତାକୁ ନେଇ ଲୋକଙ୍କ ପାଖରେ ପହଞ୍ଚିବାକୁ ଚେଷ୍ଟା କରୁଛନ୍ତି ।
