ଭୁବନେଶ୍ୱର ( ଏଟିଆର ବ୍ୟୁରୋ): ଗତକାଲି ଠାରୁ ରାଜ୍ୟରେ ଲଗାଣ ବର୍ଷା ଲାଗି ରହିଛି । ବର୍ଷାର ପରିମାଣ ଏତେ ଅଧିକ ରହିଛି ଯେ ଘରୁ ପାଦ କାଢି ହେଉନି । ଲଗାଣ ବର୍ଷା ଯୋଗୁ ଲୋକେ ନାହିଁ ନଥିବା ଅସୁବିଧାର ସମ୍ମୁଖୀନ ହେଉଛନ୍ତି । ତେବେ ଏହି ଲଗାଣ ବର୍ଷାକୁ ଦୃଷ୍ଟିରେ ରଖି ଆଜି ୬ ଟି ଜିଲ୍ଲାରେ ସ୍କୁଲ ଓ ଅଙ୍ଗନବାଡି କେନ୍ଦ୍ରକୁ ବନ୍ଦ ଘୋଷଣା କରାଯାଇଛି ।
ସେହି ସବୁ ଜିଲ୍ଲା ଗୁଡିକ ହେଲା କଟକ, ଗଞ୍ଜାମ, ଗଜପତି, ଭଦ୍ରକ, ଢେଙ୍କାନାଳ ଓ କେନ୍ଦ୍ରାପଡ଼ା । ଏହି ଜିଲ୍ଲା ମାନଙ୍କରେ ଆଜି ଦିନକ ପାଇଁ ସବୁ ସ୍କୁଲ ମାନଙ୍କୁ ବନ୍ଦ କରିବାକୁ ନିଷ୍ପତ୍ତି ହୋଇଛି । ଏହି ୬ ଜିଲ୍ଲା ସମେତ ଅନ୍ୟ ଉପକୂଳବର୍ତ୍ତୀ ଜିଲ୍ଲା ମାନଙ୍କରେ ମଧ୍ୟ ବର୍ଷା ଲାଗି ରହିଛି । ସୂଚନାଯୋଗ୍ୟ ଏହା ମୌସୁମୀ ବାୟୁ ବର୍ଷା ନୁହେଁ । ଏହା ଲଘୁଚାପ ଜନିତ ବର୍ଷା । ପାଣିପାଗ ବିଭାଗର ସୂଚନା ଅନୁସାରେ ଆହୁରି ୪୮ ଘଣ୍ଟା ରାଜ୍ୟରେ ବର୍ଷା ଲାଗି ରହିବ ।
