ଝାରସୁଗୁଡା ( ଏଟିଆର ବ୍ୟୁରୋ): ଝାରସୁଗୁଡାରେ ପୋଲିସ ଏନକାଉଣ୍ଟର । ୪ ଦୁର୍ଦ୍ଦାନ୍ତ ଅପରାଧୀ ଆହତ । ଅଭିଯୁ୍କ୍ତମାନେ ହେଲେ ଅନନ୍ତ ଧଳ, ଶୈଳେନ୍ଦ୍ର ପତ୍ର, ନିକି ସିଂ ଓ ରଫିକ ଅନସାରୀ। ସୂଚନା ଅନୁସାରେ ଗତକାଲି ରାତିରେ ବ୍ରଜରାଜନଗରସ୍ଥିତ ଲକ୍ଷ୍ମୀ କାଫେରେ ମଣ୍ଟୁ ଘୋଷ ନାମକ ଜଣେ ଯୁବକ ବସିଥିବା ବେଳେ ଚାରି ଜଣ ତାଙ୍କୁ ୪ ରାଉଣ୍ଡ ଗୁଳି ମାରିଥିଲେ । ଗୁରୁତର ଅବସ୍ଥାରେ ତାଙ୍କୁ ମଣ୍ଡଳିଆସ୍ଥିତ କେନ୍ଦ୍ରୀୟ ଚିକିତ୍ସାଳୟରେ ଭର୍ତ୍ତି କରାଯାଇଥିଲା ।
ସେଠାରେ ଡାକ୍ତର ତାଙ୍କୁ ମୃତ ଘୋଷଣା କରିଥିଲେ। ଏହି ଘଟଣାକୁ ନେଇ ଗତକାଲି ରାତିରେ ପୁଲିସ ସାରା ରାତି ଅପରାଧୀମାନଙ୍କୁ ଖୋଜୁଥିଲେ। ଅପରାଧୀଙ୍କୁ ଧରିବା ପାଇଁ ପୁରା ବ୍ରଜରାଜନଗରକୁ ସିଲ କରି ଦିଆଯାଇଥିଲା । ପରେ ମଧୁପୁର ଜଙ୍ଗଲ ନିକଟରେ ପୁଲିସ୍ ଅଭିଯୁକ୍ତଙ୍କ ମୁହାଁମୁହିଁ ହୋଇଥିଲେ। ସେମାନେ ପୁଲିସ ଆଖିରୁ ଖସି ଚାଲିଯିବାକୁ ଚେଷ୍ଟା କରିବା ସହିତ ପୋଲିସ ଉପରକୁ ଗୁଳି ଚାଳନା କରିଥିଲେ । ପୋଲିସ ମଧ୍ୟ ଗୁଳିର ପାଲଟା ଜବାବ ଦେଇଥିଲା ।
ଏହି ଗୁଳି ବିନିମୟରେ ୪ ଜଣ ଅପରାଧୀ ଆହତ ହୋଇଥିଲେ । ସେମାନଙ୍କୁ ଚିକିତ୍ସା ପାଇଁ ଝାରସୁଗୁଡା ଜିଲ୍ଲା ମୁଖ୍ୟ ଚିକିତ୍ସାଳୟରେ ଭର୍ତ୍ତି କରାଯାଇଛି। ଏହି ଅପରେସନରେ ଗାନ୍ଧୀ ଛକ ଫାଣ୍ଡି ଅଧିକାରୀ ଚୁଡାମଣି ମହାନନ୍ଦ ଆହତ ହୋଇଛନ୍ତି ।
