ହାଇଦ୍ରାବାଦ ( ଏଟିଆର ବ୍ୟୁରୋ): କିଏ ଜାଣିଥିଲା ଏମିତି ହେବ । କାମ ସାରି ଘରକୁ ଫେରୁଥିବା ବେଳେ ଅଧାବାଟ ହେବ ଶେଷ ଠିକଣା । ମୋ ଗାଡି ଖରାପ ହୋଇ ଯାଇଛି । ମତେ ଭାରି ଭୟ ଲାଗୁଛି । ମୁଁ କଣ କରିବି କିଛି ଜାଣିପାରୁନାହିଁ । ମୁଁ ଏକା ରାସ୍ତାରେ ଏହା ହିଁ ଥିଲା ଶେଷ କଲରେ ତାଙ୍କର ଶେଷ କଥା । ନାଁ ତା ପରେ ଆଉ ଫୋନ ଲାଗିଲା ନାଁ ଯୋଗାଯୋଗ । ହଠାତ ବାଟ ମଝିରୁ ସେ ଉଭାନ ହୋଇଗଲେ । ସାରା ରାତି ପରିବାର ଲୋକ ଯେତେ ଖୋଜା ଖୋଜି କଲେ ମଧ୍ୟ ମିଳିଲା ନାହିଁ ଠିକଣା । ଆଉ ସକାଳୁ ମିଳିଲା ଅଧା ପୋଡା ମୃତ ଦେହ । ହାଇଦ୍ରା ବାଦରେ ଜଣେ ଡାକ୍ତରୀ ମହିଳାଙ୍କ ସହିତ ଘଟିଥିବା ଏହି ଲୋମ ଟାଙ୍କୁରା ଘଟଣାକୁ ନେଇ ଏବେ ସାରା ଦେଶରେ ପ୍ରତିକ୍ରିୟା ପ୍ରକାଶ ପାଇଛି ।
ସୂଚନା ଅନୁସାରେ ମହିଳା ଡାକ୍ତର ଜଣଙ୍କ ଗତ ଗୁରୁବାର ରାତିରେ ଡାକତରଖାନାରେ ଡ୍ୟୁଟି ସାରି ଘରକୁ ଫେରୁଥିବା ବଳେ ହଠାତ ଅଧା ରାସ୍ତାରେ ତାଙ୍କ ଗାଡି ଚକା ପନଚର ହୋଇଯାଇଥିଲା । ଏନେଇ ଡାକ୍ତର ନିଜ ଭଉଣୀଙ୍କୁ ଫୋନ କରି ମୁଁ ଏଠାରେ ଏକା ଅଛି । ମତେ ଭୟ ଲାଗୁଥିବା କଥା କହିଥିଲେ । ଫୋନ ପାଇ ପରିବାର ଲୋକ ଉକ୍ତ ସ୍ଥାନରେ ପହଞ୍ଚିବା ପରେ ସେଠାରୁ ଉଭାନ ହୋଇଯାଇଥିଲେ ମହିଳା ଡାକ୍ତର । ସାରା ରାତି ମହିଳାଙ୍କୁ ଖୋଜା ଖୋଜି କରିବା ପରେ ତାଙ୍କର କୌଣସି ଆତାପତ୍ତା ମିଳିନଥିବା ବେଳେ ସକାଳୁ ଅଳ୍ପ ଦୂରରୁ ଉଦ୍ଧାର ହୋଇଥିଲା ତାଙ୍କର ମୃତ ଦେହ । ତେବେ ହୋଇଥିବା ଏହି ଘଟଣାକୁ ନେଇ ଭାରତରେ ନାରୀଟିଏ କେତେ ସୁରକ୍ଷିତ ତାକୁ ନେଇ ପ୍ରଶ୍ନ ସୃଷ୍ଟି ହୋଇଛି । ପୋଲିସ ପ୍ରାଥମିକ ତଦନ୍ତରୁ ଜାଣିବାକୁ ପାଇଛି ମହିଳା ଡାକ୍ତରଙ୍କ ସହିତ ଦୁଷ୍କର୍ମ କରାଯାଇଛି । ଏହି ଭିତରେ ଆଉ ଗୋଟିଏ କଥା ଏବେ ସାମ୍ନାକୁ ଆସିଛି । ଠିକ ଡାକ୍ତର ମହିଳାଙ୍କ ମୃତ ଦେହ ମିଳିବା ଅଳ୍ପ ଦୂରରୁ ଆଉ ଜଣେ ମହିଳାଙ୍କ ଅର୍ଧଦଗ୍ଧ ମୃତ ଦେହ ମିଳିଛି । ସମାନ ଢଙ୍ଗରେ ଏ ମହିଳା ଜଣଙ୍କୁ ହତ୍ୟା କରାଯାଇଥିବା ସନ୍ଦେହ କରାଯାଉଛି ।
