ଭୁବନେଶ୍ୱର (ଏଟିଆର ବ୍ୟୁରୋ): ଏଣିକି ସରକାରୀ ସ୍କୁଲରେ ପ୍ରଥମ ଶ୍ରେଣୀରୁ ଦିଆଯିବ ସ୍ପୋକନ ଇଂଲିଶ ଶିକ୍ଷା । ପିଲାମାନଙ୍କ ମଧ୍ୟରେ ଇଂରାଜୀ ଭାଷାର ପ୍ରାଧାନ୍ୟକୁ ବଢାଇବା ପାଇଁ ରାଜ୍ୟ ସରକାର ଏଭଳି ନିଷ୍ପତି ନେଇଛନ୍ତି । ସାଧାରଣତଃ ସରକାରୀ ସ୍କୁଲମାନଙ୍କରେ ଇଂରାଜୀ ଭାଷା ପ୍ରତି ପ୍ରାଧାନ୍ୟ ଦିଆଯାଉନଥିବାରୁ , ପିଲାମାନଙ୍କ ଗୁଣାତ୍ମକ ଶିକ୍ଷା ଏବଂ ଇଂରାଜୀ ଭାଷାର ପ୍ରାଧାନ୍ୟ ପାଇଁ ଅଭିଭାବକମାନେ ସେମାନଙ୍କ ପିଲାଙ୍କୁ ଘରୋଇ ଇଂରାଜୀ ମିଡିୟମ ସ୍କୁଲରେ ପାଠ ପଢାଉଛନ୍ତି । ମାତ୍ର ଏସବୁକୁ ଦୃଷ୍ଟିରେ ରଖି ଏବେ ସରକାରୀ ସ୍କୁଲରେ ଇଂରାଜୀ ଶିକ୍ଷା ପ୍ରତି ଗୁରୁତ୍ୱ ଦିଆଯିବ ବୋଲି ନିଷ୍ପତି ନିଆଯାଇଛି । ଏନେଇ ବିଦ୍ୟାଳୟ ଏବଂ ଗଣଶିକ୍ଷା ମନ୍ତ୍ରୀ ସମୀର ରଞ୍ଜନ ଦାସ ସୂଚନା ଦେଇଛନ୍ତି ।
ନିମାପଡାରେ ଆୟୋଜିତ ହୋଇଥିବା ଏକ ସମୀକ୍ଷା ବୈଠକ ସମୀର ରଞ୍ଜନ ଦାସ କହିଛନ୍ତି କି, ଏବେ ସରକାରୀ ସ୍କୁଲରେ ଇଂରାଜୀ ପ୍ରତି ଗୁରୁତ୍ୱ ଦିଆଯିବ । ଏହାସହିତ ସ୍କୁଲର ଛାତ୍ର-ଛାତ୍ରୀ ଏବଂ ଶିକ୍ଷକ-ଶିକ୍ଷୟିତ୍ରୀ ମାନଙ୍କର ଉପସ୍ଥାପନାକୁ ମଧ୍ୟ ଅନଲାଇନ୍ କରାଯିବାକୁ ନେଇ ପ୍ରସ୍ତୁତି ଚାଲିଛି ।
ଏହି ସମୀକ୍ଷା ବୈଠକରେ ବିଭିନ୍ନ ଜିଲ୍ଲାର ୨୯୪ ଟି ବିଦ୍ୟାଳୟର ପ୍ରଧାନଶିକ୍ଷକ, ବ୍ଲକ ଶିକ୍ଷା ଅଧିକାରୀ, ସିଆରସି ଏବଂ ମଣ୍ଡଳ ଅଧିକାରୀ ପ୍ରମୁଖ ସାମିଲ ଥିଲେ । ଏଥିରେ ଅନେକ ପ୍ରସଙ୍ଗ ଉପରେ ସମୀକ୍ଷା ହୋଇଥିଲା ।
