ଭୁବନେଶ୍ୱର (ଏଟିଆର ବ୍ୟୁରୋ): ବିମାନବନ୍ଦରରେ ଅଘଟଣ । ଭୁଶୁଡିଲା ନିର୍ମାଣଧୀନ କୋଠାର ଛାତ । ଏଭଳି ବଡ ଧରଣ ଅଘଟଣ ଭୁବନେଶ୍ୱର ବିଜୁ ପଟ୍ଟନାୟକ ଆନ୍ତର୍ଜାତୀୟ ବିମାନବନ୍ଦରରେ ଘଟିଛି । ଏହି ଅଘଟଣରେ ଜଣେ ଶ୍ରମିକଙ୍କର ମୃତ୍ୟୁ ଘଟିଛି ଏବଂ ଅନ୍ୟ ଜଣେ ଶ୍ରମିକ ଆହତ ହୋଇଥିବା ଜଣାପଡିଛି ।
ମୃତକ ଜଣକ ହେଲେ ଅନ୍ତର୍ଯ୍ୟାମୀ ଗୁରୁ । ତାଙ୍କ ଘର କଟକ ଜିଲ୍ଲା ବଡମ୍ବା ନରସିଂହପୁର । ଅଘଟଣ ପରେ ଅନ୍ତର୍ଯ୍ୟାମୀଙ୍କୁ ଉଦ୍ଧାର କରାଯାଇ କ୍ୟାପିଟାଲ ହସ୍ପଟାଲରେ ଭର୍ତ୍ତି କରାଯାଇଥିଲା । ମାତ୍ର ସେଠାରେ ତାଙ୍କର ମୃତ୍ୟୁ ଘଟିଥିଲା । ସେହିପରି ଆହତ ବ୍ୟକ୍ତି ଜଣକ ହେଉଛନ୍ତି ନବ କିଶୋର ସ୍ୱାଇଁ ।
ବିମାନବନ୍ଦରର ଟର୍ମିନାଲ ୧ ର ଟର୍ମିନାଲ ୨ କୁ ସଂଯୋଗ କରୁଥିବା ନିର୍ମାଣଧୀନ କୋଠାର ଛାତ ଗତକାଲି ରାତି ପ୍ରାୟ ୧୧ଟା ବେଳେ ଅଚାନକ୍ ଭୁଷୁଡି ପଡିଥିଲା । ଅଘଟଣ ପରେ ତୁରନ୍ତ ଅଗ୍ନିଶମ ବିଭାଗ ଟିମ୍, ଏନଡିଆରଏଫ, ସିଆଇଏସଏଫ ଏବଂ ଓଡ୍ରାଫ ଘଟଣାସ୍ଥଳରେ ପହଁଚି ଉଦ୍ଧାର କାର୍ଯ୍ୟ ଆରମ୍ଭ କରିଥିଲେ ।
ତେବେ ଏହି ଘଟଣାର ତଦନ୍ତ ହେବା ସହ ସଂପୃକ୍ତ ଠିକା ସଂସ୍ଥା ମାଲିକ ଦିଲ୍ଲୀପ ଖଟେଇକୁ ଏୟାରପୋର୍ଟ ଥାନାରେ ଅଟକ ରଖି ପଚରା ଉଚୁରା ଜାରି ରଖିଛି । ଭୁବନେଶ୍ୱର ଡିପିସି ଅନୁପ ସାହୁ ଠିକାଦାର ଦିଲୀପଙ୍କୁ ପଚରାଉଚରା କରୁଥିବା ସୂଚନା ମିଳିଛି।
