ଚିତ୍ରକୋଣ୍ଡା (ଏଟିଆର ବ୍ୟୁରୋ): ରାଜ୍ୟରେ ଥିବା ସମସ୍ତ ସରକାରୀ ବିଦ୍ୟାଳୟର ଶିକ୍ଷାର ମାନ ଧୀରେ ଧୀରେ ନିମ୍ନ ହେଉଥିବାର ଅଭିଯୋଗ ଆସୁଥିବା ବେଳେ ଏହାକୁ ରାଜ୍ୟ ସରକାରଙ୍କର ଶିକ୍ଷା ବିଭାଗ ଅତି ଗୁରୁତ୍ୱର ଭାବେ ଗ୍ରହଣ କରିଛି । ରାଜ୍ୟ ସରକାରଙ୍କ ୫ଟି ଅଧିନରେ ଶିକ୍ଷା ବିଭାଗ ଆସିବା ପରଠାରୁ ଗଣଶିକ୍ଷା ମନ୍ତ୍ରୀ ସମୀର ଦାଶ ବିଭିନ୍ନ ଜିଲ୍ଲା ଗ୍ରସ୍ତ କରିବା ସହ ବିଦ୍ୟାଳୟରେ ପିଲାମାନଙ୍କୁ ଦିଆଯାଉଥିବା ଶିକ୍ଷା , ବିଦ୍ୟାଳୟର ଭିତ୍ତିଭୂମି, ଓ ମଧ୍ୟାହ୍ନ ଭୋଜନର ମାନ ଯାଞ୍ଚ କରୁଛନ୍ତି ।
ତେବେ କେବଳ ଗଣଶିକ୍ଷା ମନ୍ତ୍ରୀ ବିଭିନ୍ନ ଜିଲ୍ଲାର ବିଦ୍ୟାଳୟ ପରିଦର୍ଶନ କରୁଛନ୍ତି ତାହା ନୁହେଁ, ବିଭିନ୍ନ ବିଧାୟକ ଓ ମନ୍ତ୍ରୀ ମଧ୍ୟ ବିଦ୍ୟାଳୟ ଯାଇ ସମସ୍ତ ସ୍ଥିତିର ଅନୁଧ୍ୟାନ କରୁଛନ୍ତି । ଗତକାଲି ଜନଜାତି ଓ ପଛୁଆ ବର୍ଗର କଲ୍ୟାଣ ମନ୍ତ୍ରୀ ଜଗନ୍ନାଥ ସାରକା ମାଲକାନଗିରି ଜିଲ୍ଲା ଚିତ୍ରକୋଣ୍ଡା ଅଞ୍ଚଳକୁ ଗ୍ରସ୍ତ କରିବା ସହ ସେହି ଅଞ୍ଚଳରେ ଥିବା ଏକ ଆବାସିକ ବିଦ୍ୟାଳୟକୁ ଯାଇ ପିଲାମାନଙ୍କୁ ଗଣିତ ଓ ଇଂରାଜୀ ପଢାଇଥିଲେ । ଏହାସହ ପିଲାମାନଙ୍କ ସହ ବିଭିନ୍ନ ବିଷୟରେ ଆଲୋଚନା ମଧ୍ୟ କରିଥିଲେ । ପିଲାମାନଙ୍କ ସହ ଆଲୋଚନା କରିବା ସହ ମଧ୍ୟାହ୍ନ ଭୋଜନର ମାନ ଯାଞ୍ଚ କରିବା ସହ ମଧ୍ୟାହ୍ନ ଭୋଜନ ଖାଇଥିଲେ । ଯାହାକି ସମଗ୍ର ଅଞ୍ଚଳରେ ଏବେ ଚର୍ଚ୍ଚାର ବିଷୟ ପାଲଟିଛି ।
ଅନ୍ୟପଟେ ଗଣଶିକ୍ଷା ମନ୍ତ୍ରୀ ସମୀର ଦାଶ ଅଚାନକ ସୁନ୍ଦରଗଡ ଜିଲ୍ଲାର ଏକ ବିଦ୍ୟାଳୟକୁ ପରିଦର୍ଶନ ନିମନ୍ତେ ଯାଇ ପିଲାମାନଙ୍କୁ ପାଠ ପଢା ବିଷୟରେ ବିଭିନ୍ନ ପ୍ରଶ୍ନ ପଚାରିଥିଲେ । ସେହିପରି ପୂର୍ବରୁ କନ୍ଧମାଳ ଜିଲ୍ଲା ଦାରିଙ୍ଗବାଡି ସରକାରୀ ବାଳିକା ଉଚ୍ଚ ବିଦ୍ୟାଳୟକୁ ଅଚାନକ କ୍ରୀଡା ଓ ଯୁବ ବ୍ୟାପାର ମନ୍ତ୍ରୀ ତୁଷାରକାନ୍ତି ବେହେରା ଗ୍ରସ୍ତ କରିବା ସହ ପିଲାମାନଙ୍କୁ ଗଣିତ ପାଠ ପଢାଇଥିଲେ । ମନ୍ତ୍ରୀମାନଙ୍କର ଏହିଭଳି ଗ୍ରସ୍ତ ଫଳରେ ବିଦ୍ୟାଳୟମାନଙ୍କରେ ଶିକ୍ଷାର ମାନ ବୃଦ୍ଧି ହେବା ସହ ବିଭିନ୍ନ ଭିତ୍ତିଭୂମିର ଉନ୍ନତି ହୋଇପାରିବ ବୋଲି ରାଜ୍ୟ ସରକାର ଆଶାବାନ ଅଛନ୍ତି ।
