ଭୁବନେଶ୍ୱର(ଏଟିଆର ବ୍ୟୁରୋ): ଆଜି ଦେଶରେ NEET ପରୀକ୍ଷା । ଚଳିତ ବର୍ଷ କୋଭିଡ୍ କଟକଣା ମଧ୍ୟରେ ହେବ ପରୀକ୍ଷା । କୋଭିଡ୍ ଗାଇଡଲାଇନ୍ ସହ ସମସ୍ତ ଛାତ୍ର ଛାତ୍ରୀ ପରୀକ୍ଷା ଦେବେ ଓ ଅଭିଭାବକଙ୍କ ପାଇଁ ମଧ୍ୟ ସ୍ୱତନ୍ତ୍ର ବ୍ୟବସ୍ଥା ରହିଛି ।ଓଡ଼ିଶାର ୭ଟି ସହରର ୮୩ଟି ପରୀକ୍ଷା କେନ୍ଦ୍ରରେ ୩୬ ହଜାର ୪୫୯ ପରୀକ୍ଷାର୍ଥୀ ପରୀକ୍ଷା ଦେବେ । ଏହାକୁ ଆଖି ଆଗରେ ରଖି ରାଜ୍ୟ ସରକାର ପରୀକ୍ଷାର୍ଥୀ ଏବଂ ଅଭିଭାବକଙ୍କ ପାଇଁ ଯାତାୟତ,ରହିବା, ଖାଇବାର ମଧ୍ୟ ବ୍ୟବସ୍ଥା କରିଛନ୍ତି । ସାମାଜିକ ଦୂରତା ରକ୍ଷା କରି ପ୍ରତି ପରୀକ୍ଷା କେନ୍ଦ୍ରରେ ଗୋଟେ ହଲରେ ୧୨ ଜଣ ପରୀକ୍ଷାର୍ଥୀ ପରୀକ୍ଷା ଦେବେ ।
NTA ପକ୍ଷରୁ ସମସ୍ତଙ୍କୁ ଦିଆଯିବ ମାସ୍କ । ତେବେ ଆଜି NEET ଦେଇପାରିବେନି କରୋନା ପଜିଟିଭ୍ ଛାତ୍ରଛାତ୍ରୀ । କରୋନା ପଜିଟିଭ୍ ଥିବା ଛାତ୍ରଛାତ୍ରୀ ଅନ୍ୟ ଦିନରେ ପରୀକ୍ଷା ଦେବେ । ଆଜି ପରୀକ୍ଷା ସରିବା ପରେ ସେମାନଙ୍କ ପାଇଁ ଦିନ ଧାର୍ୟ୍ୟ କରାଯିବ । ନୂଆ ଏସଓପି ନେଇ ନ୍ୟାସନାଲ ଟେଷ୍ଟିଂ ଏଜେନ୍ସି ପକ୍ଷରୁ ସୂଚନା ଦିଆଯାଇଛି ।
ଓଡ଼ିଶାରେ ପରୀକ୍ଷା କେନ୍ଦ୍ର ଗୁଡିକ ହେଉଛି ଅନୁଗୁଳ, ବାଲେଶ୍ୱର, ବ୍ରହ୍ମପୁର, ଭୁବନେଶ୍ୱର, କଟକ, ରାଉରକେଲା ଓ ସମ୍ବଲପୁର ସହର। ପରୀକ୍ଷା ସରିବା ପରେ ପ୍ରୋଭିଜନାଲ୍ ଆନସର୍ କି’ ଏହି ମାସ ଶେଷ ସପ୍ତାହରେ ବାହାରିବାର ସମ୍ଭାବନା ରହିଛି । ସେହିପରି ପୂର୍ଣ୍ଣ ଆନସର୍ କି ଅକ୍ଟୋବର ପ୍ରଥମ ସପ୍ତାହରେ ଓ ପରୀକ୍ଷା ଫଳ ଦ୍ୱିତୀୟ ସପ୍ତାହରେ ବାହାରିବ ବୋଲି ଜାତୀୟ ଗଣମାଧ୍ୟମ ପକ୍ଷରୁ ସୂଚନା ମିଳିଛି ।
