ଶ୍ରୀନଗର (ଏଟିଆର ବ୍ୟୁରୋ): ଜାମ୍ମୁ କାଶ୍ମୀରର ପୁଲୱାମାରେ ଆଜି ସକାଳୁ ପୁଣି ଗୁଳିମାଡ ଆରମ୍ଭ ହୋଇଯାଇଛି । ଏହି ଗୁଳି ବିନିମୟରେ ୩ଜଣ ଆତଙ୍କ ବାଦୀ ଗିରଫ ହୋଇଥିବା ନେଇ ସୂଚନା ମିଳିଛି । ଗିରଫ ହୋଇଥିବା ଆତଙ୍କବାଦୀମାନେ ହିଜବୁଲ ମୁଜାହିଦ୍ଦିନର ବୋଲି ସୂଚନା ମିଳିଛି । ସେମାନଙ୍କ ନିକଟରୁ ବିପୁଳ ପରିମାଣର ଅସ୍ତ୍ରଶସ୍ତ୍ର ସହ ହ୍ୟାଣ୍ଡ ଗ୍ରେନେଡ ଉଦ୍ଧାର କରାଯାଇଛି । ସୂଚନାନୁଯାୟୀ ଜାମ୍ମୁକାଶ୍ମୀର ପୋଲିସ, ସେନାର ୫୦ ରାଷ୍ଟ୍ରୀୟ ରାଇଫଲ ଏବଂ ସିଆରପିଏଫର ମିଳିତ ଉଦ୍ୟମରେ ଏହି ଏନକାଉଣ୍ଟର ଜାରି ରହିଛି ।
ପୂରା ଅଞ୍ଚଳକୁ ସିଲ କରିଦିଆଯିବା ସହ ସୁରକ୍ଷା ବ୍ୟବସ୍ଥାକୁ କଡାକଡି କରି ଦିଆଯାଇଛି । ତେବେ ଏହି ଗୁଳି ବିନିମୟରେ ୨ଯବାନ ଆହତ ହୋଇଥିବା ସୂଚନା ମିଳିଛି । ପୁଲୱାମାରେ ଗତକାଲି ମଧ୍ୟ ସୁରକ୍ଷାବାହିନୀର ଯବାନ ଓ ଆତଙ୍କବାଦୀଙ୍କ ମଧ୍ୟରେ ଏନକାଉଣ୍ଟର ହୋଇଥିଲା । ସେହି ସମୟରେ ଏକ ଘର ଭିତରେ ୨ ଜଣ ଆତଙ୍କବାଦୀ ଲୁଚି ଥିଲେ । ସେଠାରେ ଯବାନମାନେ ଗୁଳି କରିଥିଲେ । ଏହା ପରେ ତଲାଶୀ ଅଭିଯାନ ଚାଲିଥିଲା । ଆଖପାଖ ଅଂଚଳରେ ଅପରେଶନ ଜାରି ରହିଛି ।
