ଭୁବନେଶ୍ୱର (ଏଟିଆର ବ୍ୟୁରୋ): ଆସୁଛନ୍ତି ମା’ । ଏନେଇ ଚାରିଆଡେ ଉତ୍ସବମୁଖର । ଆଜି ମଣ୍ଡପରେ ପାଳନ ହେବ ମା ଦୁର୍ଗାଙ୍କର ଷଷ୍ଠୀ ପୂଜା । ସନ୍ଧ୍ୟାରେ ବେଲ ବରଣ କରାଯାଇ ମା’ଙ୍କର ଆବାହନ କରାଯିବ । ଏନେଇ ସମସ୍ତ ପ୍ରସ୍ତୁତି ଶେଷ ପର୍ଯ୍ୟାୟରେ ପହଁଚିଛି । କରୋନା କଟକଣା ମଧ୍ୟରେ ପୂଜା ପାଇବେ ଦୁର୍ଗତିନାଶିନୀ ମା ଦୁର୍ଗା ।
ଚଳିତବର୍ଷ ମା ଦୁର୍ଗାଙ୍କ ଦର୍ଶନ ପାଇଁ କୌଣସି ମଣ୍ଡପରେ ଭକ୍ତଙ୍କୁ ଅନୁମତି ନାହିଁ । ମଣ୍ଡପରେ କେବଳ ୭ ଜଣ ରହିପାରିବେ । ମଣ୍ଡପ ଚାରିପାଖ ଆବଦ୍ଧ କରାଯିବ । ପରଦା ପଛପଟେ ରହି ପୂଜା ପାଇବେ ମା ଦୁର୍ଗା । ଭକ୍ତଙ୍କ ପାଇଁ ମଣ୍ଡପଗୁଡିକ ପକ୍ଷରୁ ସୋସିଆଲ ମିଡିଆ ଜରିଆରେ ଦର୍ଶନ ପାଇଁ ବ୍ୟବସ୍ଥା କରାଯାଇଛି । ଏହାସହିତ ମଣ୍ଡପରେ ଭୋଜିଭାତ ପାଇଁ ଅନୁମତି ନଥିବା ସହ ଏଥରକ ମାଙ୍କ ଭସାଣି ପାଇଁ ସୋଭାଯାତ୍ରା ମଧ୍ୟ ହେବ ନାହିଁ ।
