ଭୁବନେଶ୍ୱର,(ଏଟିଆର ବ୍ୟୁରୋ) : କାହାର ହାତ ତ’ ଆଉ କାହାର ଗୋଡ । ପୁଣି କାହାର ମୁଣ୍ଡରେ ଲାଗିଛି ଗଭୀର ଆଘାତ । ବସ ଦୁର୍ଘଟଣା ପରେ ଏମିତି ଦଶା ଭୋଗିଛନ୍ତି ୭ଜଣ ଯାତ୍ରୀ । ଯାହାଙ୍କୁ ଅତି ଗୁରୁତର ଅବସ୍ଥାରେ ଉଦ୍ଧାର କରାଯାଇ ହସପିଟାଲରେ ଭର୍ତ୍ତି କରାଯାଇଛି ।
ଦିନ ସାଢ଼େ ୧୨ଟା ବେଳେ ଏମିତି ଦୁର୍ଘଟଣା ଘଟିଛି କଳ୍ପନା ଛକରେ । ଅଗ୍ନିଶମ ବିଭାଗର କର୍ମଚାରୀମାନେ ପହଞ୍ଚି ଆହତଙ୍କୁ ଉଦ୍ଧାର କରିଛନ୍ତି । ଡ୍ରାଇଭରର ଖାମଖିଆଲି ଡ୍ରାଇଭିଂ ଯୋଗୁ ଏଭଳି ଦୁର୍ଘଟଣା ଘଟିଥିବା କୁହାଯାଉଛି । ମିଳିଥିବା ରିପୋର୍ଟ ଅନୁସାରେ, ପୁରୀରୁ ଆସୁଥିବା ସାଇ ନାମକ ଏକ ବସ କଳ୍ପନା ଛକରେ ଥିବା ରାସ୍ତାର ବ୍ୟାରିକେଡକୁ ଧକ୍କା ଦେଇଥିଲା । ଫଳରେ ଭିତରେ ଥିବା ଯାତ୍ରୀ ଲହୁଲୁହାଣ ହୋଇଥିଲେ । ଘଟଣାକୁ ନେଇ ବେଶ କିଛି ସମୟ ସେଠାରେ ଉତ୍ତେଜନା ଦେଖାଦେବା ସହ ଟ୍ରାଫିକ ସମସ୍ୟା ଉପୁଜିଥିଲା ।
