ଯାଜପୁର (ଏଟିଆର ବ୍ୟୁରୋ); ଦିନକୁ ଦିନ ବଢ଼ିବାରେ ଲାଗିଛି ଦୁର୍ଘଟଣାର ସଂଖ୍ୟା । କେତେବେଳେ ମଣିଷର ଜୀବନ ଚାଲି ଯାଉଛି ତ ଆଉ କେତେବେଳେ ରାସ୍ତା ପାର ହେଉଥିବା ଜଙ୍ଗଲୀ ଜନ୍ତୁ । ତେବେ ସୋମବାର ରାତିରେ ରାସ୍ତା ପାର ହେଉଥିବା ମା ଏବଂ ଛୁଆ ଭାଲୁକୁ ଅଜଣା ଗାଡି ଧକ୍କା ଦେଇ ଚାଲିଯାଇଥିବା ଦେଖିବାକୁ ମିଳିଛି । ଯାଜପୁର ଜିଲ୍ଲା ୨୦ ନମ୍ବର ଜାତୀୟ ରାଜପଥ ରଗଡି ନିକଟରେ ଏଭଳି ଘଟିଥିବା ଶୁଣିବାକୁ ମିଳିଛି ।
ମିଳିଥିବା ସୂଚନା ଅନୁଯାୟୀ, ମଙ୍ଗଳବାର ସକାଳୁ ରଗଡି ଛକ ସରକାରୀ ପଲିଟେକନିକ ଆଗରେ ଦୁଇଟି ଭାଲୁଙ୍କ ମୃତ ଦେହ ପଡିଥିବା ଦେଖିବାକୁ ପାଇଥିଲେ । କାଳେ ଦୁଇ ବନ୍ୟ ଜନ୍ତୁ ଜୀବନ୍ତ ଅଛନ୍ତି ଭାବି କେହି ପାଖକୁ ଯାଇନଥିଲେ । ପରେ ସାହସ କରି କିଛି ଯୁବକ ପାଖକୁ ଯାଇ ଦେଖିଥିଲେ ଭାଲୁ ଦ୍ୱୟ ମୃତ । ସେମାନେ ବନ ବିଭାଗକୁ ଖବର ଦେଇଥିଲେ । ବନ ବିଭାଗ କର୍ମଚାରୀ ଆସି ଘଟଣାସ୍ଥଳରେ ପହଁଞ୍ଚିଥିଲେ ।
ଦୁଇ ମୃତ ଭାଲୁକୁ ଉଦ୍ଧାର କରି ବ୍ୟବଛେଦ ପାଇଁ ପଠାଇ ଦେଇଛି ବନ ବିଭାଗ । ମୃତ ଭାଲୁ ଦ୍ୱୟ ମା ଏବଂ ଛୁଆ ଭାଲୁ ବୋଲି ଅନୁମାନ କରାଯାଇଛି । ମା ଭାଲୁର ବୟସ ୮ ବର୍ଷ ଏବଂ ଛୁଆ ଭାଲୁର ବୟସ ୬ମାସ ବୋଲି ଅନୁମାନ କରାଯାଉଛି । ତେବେ ଗତକାଲି କେଉଁ ଗାଡି ଧକ୍କା ଦେଇଛି ତାହା ଜଣା ପଡିନାହିଁ ।
