ସମ୍ବଲପୁର (ଏଟିଆର ବ୍ୟୁରୋ): କୁଲର ଗୋଦାମରେ ଭୟାବହ ଅଗ୍ନିକାଣ୍ଡ । ଜଳି ପୋଡି ପାଉଁଶ ହୋଇଯାଇଛି ଅନେକ କୁଲର ଏବଂ କୁଲର ସାମଗ୍ରୀ । ଏଭଳି ଏକ ଅଗ୍ନିକାଣ୍ଡ ସମ୍ବଲପୁର ଜିଲ୍ଲା ସୁନାପାଲି ଅଞ୍ଚଳରେ ଘଟିଛି ।
ସୁନାପାଲି ଅଞ୍ଚଳରେ ଥିବା ଏକ କୁଲର ଗୋଦାମରେ ଗତକାଲି ରାତି ପ୍ରାୟ ୧୧ ଟା ବେଳେ ଅଚାନକ୍ ନିଆଁ ଲାଗି ଯାଇଥିଲା । ଗୋଦାମରେ ନିଆଁ ଲାଗି ଯାଇଥିବାର ଦେଖି ସ୍ଥାନୀୟ ଲୋକ ସମ୍ବଲପୁର ଅଗ୍ନିଶମ ବିଭାଗକୁ ଖବର ଦେଇଥିଲେ । ଖବର ପାଇ ଅଗ୍ନିଶମ ବିଭାଗ କର୍ମୀ ଆସି ନିଆଁକୁ ଆୟତ୍ତ କରିବା ପାଇଁ ଚେଷ୍ଟା କରିଥିଲେ । ମାତ୍ର ଗୋଦାମରେ ନିଆଁ ଲାଗିବା ପରେ ଧୂଆଁ ଏତେ ମାତ୍ରାରେ ହୋଇଥିଲା ଯେ ଗୋଦାମ ଭିତରକୁ ପଶିବା ଲାଗି ଅଗ୍ନିଶମ ବିଭାଗକୁ କଷ୍ଟକର ହୋଇଥିଲା । ଏହାପରେ ଧୀରେ ଧୀରେ ନିଆଁକୁ ଆୟତ୍ତ କରିଥିଲେ ଅଗ୍ନିଶମ ବିଭାଗ କର୍ମୀ । ଅନ୍ୟପଟେ ଗୋଦାମରେ ବିଦ୍ୟୁତ୍ ସର୍ଟ ସର୍କିଟ ଯୋଗୁଁ ଲାଗିଛି ବୋଲି ଅନୁମାନ କରାଯାଉଛି ।
