ଭୁବନେଶ୍ୱର(ଏଟିଆର ବ୍ୟୁରୋ): ଆଜି ସକାଳୁ ଝାଡସୁଗୁଡା ବ୍ରଜରାଜନଗରରୁ ବିଶାଖାପାଟନମ କୁ ଯାଉଥିବା ଏକ କୋଇଲା ବୋଝେଇ ଟ୍ରେନରେ ନିଆଁ ଲାଗିଯାଇଥିଲା । ସୂଚନା ଅନୁସାରେ ବରଗଡ ଜିଲ୍ଲା ଅନ୍ତର୍ଗତ ଗୋଡଭଗା ରେଲୱେ ଷ୍ଟେସନ ନିକଟରେ ଏହି ଅଗ୍ନିକାଣ୍ଡ ଘଟିଥିଲା । ଏହି ନିଆଁକୁ ପ୍ରଥମେ ଟ୍ରେନର ଗାର୍ଡ ଦେଖିଥିଲେ । ଟ୍ରେନର ବଗି ନଂ ୯ରେ ନିଆଁ ଲାଗିଥିଲା । ଏହା ପରେ ଟ୍ରେନକୁ ନିକଟସ୍ଥ ଗୋଡଭଗା ଷ୍ଟେସନକୁ ନିଆଯିବା ସହ ଅଗ୍ନିଶମ ବିଭାଗକୁ ଖବର ଦିଆଯାଇଥିଲା । ତେବେ ଘଟଣା ସ୍ଥଳରେ ଅତାବିରା, ସମ୍ବଲପୁର ଓ ବରଗଡ ଅଗ୍ନିଶମ ବାହିନୀ ଆଗରୁ ସଜାଗ ହୋଇ ରହିଥିଲା ।
୩ଟି ଅଗ୍ନିଶମ ବାହିନୀଙ୍କ ବହୁ ଚେଷ୍ଟା ପରେ ନିଆଁକୁ ଆୟତ୍ତ କରାଯାଇ ପାରିଥିଲା । ତେବେ ଏଥିରେ କାହାର କିଛି କ୍ଷତି ହୋଇନଥିବାର ସୂଚନା ମିଳିଛି । ସୂଚନାଯୋଗ୍ୟ ଥାଉକି ଗତକାଲି ବିଶାଖାପାଟଣାରୁ ରାୟପୁର ଅଭିମୁଖେ ଯାଉଥିବା ଟ୍ରେନରେ ଦୁଇ ଦୁଇଥର ନିଆଁ ଲାଗିଯାଇଥିଲା । ରହେନଭଟା ରେଲୱେ ଷ୍ଟେସନରେ କୋଇଲା ବୋଝଇ ଟ୍ରେନର ଦୁଇଟି ବଗିରେ ଲାଗିଥିଲା ନିଆଁ । ନିଆଁଟିକୁ ସଙ୍ଗେ ସଙ୍ଗେ ଆୟତ କରାଯାଇଥିଲା ଓ ଏହାପରେ ଟ୍ରେନଟି ରାୟପୁର ଅଭିମୁଖେ ବାହାରିଥିଲା ।
