ବରଗଡ (ଏଟିଆର ବ୍ୟୁରୋ); ସୋମବାର ସକାଳୁ ସକାଳୁ ବରଗଡ ସହରରୁ ଏକ ଦୁଃଖଦ ଖବର ଆସିଛି । ବାଇକକୁ କାର ଧକ୍କା ଦେବାରୁ ଜଣଙ୍କର ମୃତ୍ୟୁ ହୋଇଥିବା ବେଳେ ଅନ୍ୟଜଣେ ଗୁରୁତର ଆହତ ହୋଇଛନ୍ତି । ବରଗଡ ଜିଲ୍ଲା ସୋହେଲା ୫୩ ନମ୍ବର ଜାତୀୟ ରାଜପଥରେ ଘଟିଛି ଏହି ମର୍ମନ୍ତୁଦ ସଡକ ଦୁର୍ଘଟଣା । ମୃତକ ହେଲେ ଯଜାତି ସାହୁ । ପୋଲିସ ଖବର ପାଇବା ପରେ ମୃତ ଦେହକୁ ଉଦ୍ଧାର କରି ବ୍ୟବଛେଦ ପାଇଁ ପଠାଇ ଦେଇଛି ।
ମିଳିଥିବା ସୂଚନା ମୁତାବକ ଆଜି ସକାଳୁ ସୋହେଲାରୁ ବରଗଡ଼ ଆସୁଥିବା ଏକ କାର ରାସ୍ତାର ଡିଭାଇଡ଼ର ଡେଇଁ ଅପର ପାର୍ଶ୍ୱରେ ବରଗଡ଼ ପଟୁ ବାଇକ ଆରୋହିଙ୍କୁ ଧକ୍କା ଦେଇଥିଲା । ସ୍ଥାନୀୟ ଲୋକ ଉଭୟ ବାଇକ ଆରୋହୀଙ୍କୁ ଉଦ୍ଧାର କରିଥିଲେ । ପ୍ରଥମେ ସ୍ଥାନୀୟ ଗୋଷ୍ଠୀ ସ୍ୱାସ୍ଥ୍ୟ କେନ୍ଦ୍ରରେ ଭର୍ତ୍ତି କରିଥିଲେ । ଏବଂ ବୁର୍ଲା ଡାକ୍ତରଖାନାକୁ ନିଆଯାଇଥିଲା ।
ବୁର୍ଲା ମେଡିକାଲରେ ପହଁଞ୍ଚିବାରେ ବିଳମ୍ବ ହୋଇଥିଲା ଡାକ୍ତର ତାଙ୍କୁ ସେଠାରେ ମୃତ ଘୋଷଣା କରିଥିଲେ । ତେବେ ବାଇକରେ ଯାଇଥିବା ଅନ୍ୟଜଣେ ଗୁରୁତର ଆହତ ହୋଇଛନ୍ତି । ତାଙ୍କ ଅବସ୍ଥା ଏବେ ସଙ୍କଟାପର୍ଣ୍ଣ ରହିଥିବା ସୂଚନା ମିଳିଛି । ମୃତ୍ୟୁ ଖବର ଶୁଣିବା ପରେ ପରିବାର ଲୋକ ଦୁଃଖରେ ଭାଙ୍ଗି ପଡିଛନ୍ତି । ପୋଲିସ ଖବର ପାଇଁ ଘଟଣାର ତଦନ୍ତ ଆରମ୍ଭ କରିଛି । କାରକୁ ଜବତ କରିଛି ପୋଲିସ । ଦୁର୍ଘଟଣାରେ କାରଟି ସମ୍ପୂର୍ଣ୍ଣ ଭାବରେ ଭାଙ୍ଗିଯାଇଥିବା ଦେଖିବାକୁ ମିଳିଛି ।
