ଭୁବନେଶ୍ୱର (ଏଟିଆର ବ୍ୟୁରୋ); କଟକ ଚୌଦ୍ୱାରର ନବ ନିର୍ବାଚିତ ବିଧାୟକ ସୌଭିକ ବିଶ୍ୱାଳ ଗାଡି ଦୁର୍ଘଟଣା ଗ୍ରସ୍ତ । ଅଳ୍ପକେ ବର୍ତ୍ତିଲେ ସୌଭିକ । ତାଙ୍କର ଜଣେ ସହଯୋଗୀ ଆହତ ହୋଇଛନ୍ତି । ୧୬ ନମ୍ବର ଜାତୀୟ ରାଜପଥ ହଂସପାଳ ଛକ ନିକଟ ପୁରୀ କେନାଲ ଛକ ନିକଟରେ ଘଟିଥିଲା ଦୁର୍ଘଟଣା । ପୋଲିସ ଖବର ପାଇବା ପରେ ଘଟଣାସ୍ଥଳରେ ପହଁଞ୍ଚିଥିଲା । ଦୁର୍ଘଟଣା ହୋଇଥିବା କାର ଦୁଇଟିକୁ ଥାନାକୁ ନେଇଛି ।
ସୋମବାର କୌଣସି ଏକ କାମରେ ସୌଭିକ ଭୁବନେଶ୍ୱର ଆସିଥିଲେ । କାମ ସରିବା ପରେ ପୁଣିଥରେ କଟକ ଫେରୁଥିବା ବେଳେ ପୁରୀ କେନାଲ ଛକ ନିକଟରେ ଏକ କାର ତାଙ୍କ ଗାଡିକୁ ପଛପଟୁ ଧକ୍କା ଦେଇଥିଲା । ଏଥିରେ ତାଙ୍କ ବନ୍ଧୁଙ୍କୁ ଆଘାତ ଲାଗିଥିଲା । ତେବେ ଦୁର୍ଘଟଣା ହେବାପରେ ରାସ୍ତାରେ କାର ଦୁଇଟି ରହିବାରୁ ରାସ୍ତା ଜାମ ହୋଇଥିଲା । ପରେ ମଞ୍ଚେଶ୍ୱର ପୋଲିସ ଘଟଣାସ୍ଥଳରେ ପହଁଞ୍ଚି କାର ଦୁଇଟିକୁ ହଟେଇବା ପରେ ଗାଡି ଚଳାଚଳ ସ୍ୱାଭାବିକ ହୋଇଥିଲା ।
ସୂଚନାଯୋଗ୍ୟ,ରାଜ୍ୟ ରାଜନୀତିର ଚର୍ଚ୍ଚିତ ନେତା ପ୍ରଭାତ ବିଶ୍ୱାଳଙ୍କ ପୁଅ ହେଉଛନ୍ତି ସୌଭିକ ବିଶ୍ୱାଳ । ଚଳିତ ବର୍ଷ ତାଙ୍କ ବାପାଙ୍କ ବଦଳରେ ସୌଭିକ ବିଶ୍ୱାଳଙ୍କ ଉପରେ ଭରଷା କରି ଟିକେଟ ଦେଇଥିଲା ବିଜେଡି । ସେ ବିଜେପିର ନୟନ କିଶୋର ମହାନ୍ତିଙ୍କୁ ବଡ ବ୍ୟବଧାନରେ ପରାସ୍ତ କରିଥିଲେ । ସୌଭିକଙ୍କୁ ମିଳିଥିଲା ୬୪,୬୮୬ ଖଣ୍ଡ ଭୋଟ । ପ୍ରଥମଥର ନିର୍ବାଚନ ଲଢ଼ି ବିଜୟର ସ୍ୱାଦ ଚାଖିଥିଲେ ସୌଭିକ ।
