ଅନୁଗୋଳ (ଏଟିଆର ବ୍ୟୁରୋ); ଦଣ୍ଡନାଚ ଦେଖି ଖୁସିରେ ଘରକୁ ଫେରୁଥିଲେ । କିନ୍ତୁ ଘରେ ପହଁଞ୍ଚିବା ପୂର୍ବରୁ ସବୁ କିଛି ସରିଯାଇଥିଲା । ସ୍କୁଟିରେ ଆସୁଥିବା ତିନିଜଣଙ୍କୁ ପଛପଟୁ ଧକ୍କା ଦେଇଥିଲା ଟ୍ରକ । ଦୁର୍ଘଟଣାରେ ଚାଲିଗଲା ୩ଜଣଙ୍କ ଜୀବନ । ତେବେ ଏଭଳି ମର୍ମନ୍ତୁଦ ସଡକ ଦୁର୍ଘଟଣା ଘଟିଛି ଅନୁଗୋଳ ଜିଲ୍ଲା ପିଟିସି ଛକ ନିକଟରେ । ମୃତକମାନେ ହେଲେ ଦୀପକ ନାୟକ,କାଳିଆ ନାୟକ ଏବଂ ଦିଲୀପ ନାୟକ । ସମସ୍ତଙ୍କ ଘର ତୁରଙ୍ଗ ଗାଁରେ ବୋଲି ଜଣାପଡିଛି । ପୋଲିସ ଖବର ପାଇବା ପରେ ଘଟଣାର ତଦନ୍ତ ଆରମ୍ଭ କରିଛି ।
ପୋଲିସ ସୂଚନା ମୁତାବକ ଗତକାଲି ବିଳମ୍ବିତ ରାତିରେ ମୃତକ ତିନିଜଣ ଯାକ ଦଣ୍ଡନାଚ ଦେଖି ଘରକୁ ଫେରୁଥିଲେ । ପିଟିସି ଛକ ନିକଟରେ ପଛପଟୁ ଏକ ଟ୍ରକ ଆସି ଧକ୍କା ଦେଇଥିଲା । ଗାଡିୟ ସହ ତିନିଜଣ ତଳେ ପଡିବା ପରେ ଟ୍ରକ ପ୍ରାୟ ଏକ କିଲୋମିଟର ପର୍ଯ୍ୟନ୍ତ ଘୋଷାଡି ନେଇଯାଇଥିଲା । ଫଳରେ ଘଟଣାସ୍ଥଳରେ ହିଁ ଦୀପକ ଏବଂ କାଳିଆର ମୃତ୍ୟୁ ହୋଇଥିଲା । ଦିଲୀପଙ୍କ ଅବସ୍ଥା ଗୁରୁତର ଥିଲା । ତାଙ୍କୁ କଟକ ବଡ ମେଡିକାଲକୁ ନେଉଥିବା ବାଟରେ ମୃତ୍ୟୁ ହୋଇଥିଲା । ପୋଲିସ ଖବର ପାଇବା ପରେ ଟ୍ରକ ଏବଂ ସ୍କୁଟିକୁ ଜବତ କରିଛି । ମୃତଦେହକୁ ଉଦ୍ଧାର କରି ବ୍ୟବଛେଦ ପାଇଁ ପଠାଇ ଦେଇଛି ପୋଲିସ । ଗୋଟିଏ ଗାଁର ତିନିଜଣଙ୍କର ଅକାଳରେ ମୃତ୍ୟୁ ହୋଇଥିବାରୁ ଗାଁରେ ଦୁଃଖର ଛାୟା ଖେଳିଯାଇଛି ।
