କେନ୍ଦୁଝର (ଏଟିଆର ବ୍ୟୁରୋ); ସକାଳେ ପ୍ରାତଃ ଭ୍ରମଣ କରୁଥିଲେ ଦୁଇ ଭଉଣୀ । ଦ୍ରୃତବେଗରେ ଆସୁଥିବା ଟ୍ରକ ସେମାନଙ୍କ ଚପାଇ ଚାଲିଗଲା । ଘଟଣାସ୍ଥଳରେ ଦୁଇ ଭଉଣୀଙ୍କ ମୃତ୍ୟୁ ହୋଇଛି । କେନ୍ଦୁଝର ଜିଲ୍ଲା ୨୦ ନମ୍ବର ଜାତୀୟ ରାଜପଥ ରାଇସୁଆଁରେ ଠାରେ ଘଟିଛି ଏଭଳି ଦୁଃଖଦ ଘଟଣା । ମୃତକ ଦ୍ୱୟ ହେଲେ ୪୫ ବର୍ଷୀୟା ନିବେଦିତା ଦାସ ଏବଂ ୫୫ ବର୍ଷୀୟା ପଙ୍କଜିନୀ ଦାସ । ପୋଲିସ ଉଭୟଙ୍କ ମୃତଦେହକୁ ଉଦ୍ଧାର କରି ବ୍ୟବଛେଦ ପାଇଁ ପଠାଇ ଦେଇଛି ।
ପୋଲିସ ରିପୋର୍ଟ ମୁତାବକ ଦୁଇ ଭଉଣୀ ସବୁଦିନ ସକାଳେ ପ୍ରାତଃ ଭ୍ରମଣ କରିଥାନ୍ତି । ସୋମବାର ଉଭୟ ସକାଳୁ ସକାଳୁ ରାସ୍ତା କଡରେ ଯାଉଥିବା ବେଳେ ଦୃତଗତିରେ ଏକ ଟ୍ରକ ଆସି ସେମାନଙ୍କୁ ଧକ୍କା ଦେଇ ଚାଲିଯାଇଥିଲା । ଏତେ ଜୋରରେ ମାଡ ହୋଇଥିଲା କି ଘଟଣାସ୍ଥଳରେ ହିଁ ଉଭୟଙ୍କ ମୃତ୍ୟୁ ହୋଇଥିଲା । ସ୍ଥାନୀୟ ଲୋକ ଖବର ଦେବା ପରେ ଘଟଣାସ୍ଥଳରେ ପହଁଞ୍ଚିଥିଲା ପୋଲିସ ।
ମୃତ ଦେହ ଦ୍ୱୟକୁ ପୋଲିସ ଉଦ୍ଧାର କରି ବ୍ୟବଛେଦ ପାଇଁ ପଠାଇ ଦେଇଛି । ଧକ୍କା ଦେଇ ଦୃତଗତିରେ ଚାଲିଯାଇଥିବା ଟ୍ରକକୁ ସ୍ଥାନୀୟ ପୋଲିସ ପିଛା କରି ବନାଯୋଡି ଟୋଲ ଗେଟ ନିକଟରେ ଧରିଥିଲା । ଟ୍ରକକୁ ଜବତ କରିବା ସହିତ ଡ୍ରାଇଭରକୁ ଅଟକ ରଖିଛି ପୋଲିସ । ଅପରପକ୍ଷରେ ମୃତକଙ୍କ ପରିବାର କ୍ଷତି ପୂରଣ ଦାବି କରିଛନ୍ତି । ଯାହାକୁ ନେଇ ସ୍ଥାନୀୟ ଅଞ୍ଚଳରେ ଚାପା ଉତ୍ତେଜନା ମଧ୍ୟ ଦେଖା ଦେଇଛି ।
