ଭୁବନେଶ୍ୱର (ଏଟିଆର ବ୍ୟୁରୋ): ପରଲୋକରେ ଓଡିଆ ଫିଲ୍ମ ଜଗତର ବରିଷ୍ଠ ଅଭିନେତା ଅଜିତ ଦାସ । ୭୦ଦଶକର ଲୋକପ୍ରିୟ ଅଭିନେତା ଅଜିତ ଦାସ ଆଉ ନାହାନ୍ତି । ଆଜି ୭୧ବର୍ଷ ବୟସରେ ଭୁବନେଶ୍ୱର ସ୍ଥିତ ଏକ ଘରୋଇ ଚିକିତ୍ସାଳୟରେ ତାଙ୍କର ଦେହାନ୍ତ ଘଟିଛି । ଗତ କିଛି ଦିନ ହେବ ତାଙ୍କ ସ୍ୱାସ୍ଥ୍ୟବସ୍ଥା ଠିକ ନଥିବାରୁ ସେ ଚିକିତ୍ସା ନିମନ୍ତେ ଏକ ଘରୋଇ ହସ୍ପିଟାଲରେ ଭର୍ତ୍ତି ହୋଇଥିଲେ । ତେବେ ଆଜି ତାଙ୍କର ଚିକିତ୍ସାଧୀନ ଅବସ୍ଥାରେ ଦେହାନ୍ତ ଘଟିଛି । ଏନେଇ ତାଙ୍କ ପତ୍ନୀ ମାୟା ଦାଶ ସୂଚନା ଦେଇଛନ୍ତି ।
ମୟୂରଭଞ୍ଜର କାଞ୍ଚିଆରେ ଜନ୍ମଗ୍ହଣ କରିଥିବା ଏହି ଅଭିନେତା ଜଣକ ସିନ୍ଦୁରବିନ୍ଦୁ ଫିଲ୍ମ ଜରିଆରେ ନିଜର ଫିଲ୍ମ କ୍ୟାରିୟର ଆରମ୍ଭ କରିଥିଲେ । ଏହାଛଡା ହାକିମ ବାବୁ, ମା, ତୁଣ୍ଡବାଇଦ ଫିଲ୍ମରେ ନିଜର ଦମଦାର ଅଭିନୟ କଳାରେ ଦର୍ଶକଙ୍କ ମନ ଜିତି ନିଜ ପାଇଁ ଏକ ସ୍ୱତନ୍ତ୍ର ସ୍ଥାନ ସୃଷ୍ଟି କରିପାରିଥିଲେ । ସ୍ୱର୍ଗତ ଅଜିତ ଦାସଙ୍କ ମୃତ୍ୟୁ ଫଳରେ ଓଲିଉଡ ଜଗତରେ ଏକ ଅପୂରଣୀୟ କ୍ଷତି ସୃଷ୍ଟି ହୋଇଛି ।
