ମୁମ୍ବାଇ(ଏଟିଆର ବ୍ୟୁରୋ): ଡ୍ରଗ୍ ସଂଯୋଗରେ ସୁଶାନ୍ତ ସିଂ ରାଜପୁତ ମାମଲାରେ ଏନସିବି କ୍ରମାଗତ ଭାବେ କାର୍ୟ୍ୟାନୁଷ୍ଠାନ ଗ୍ରହଣ କରୁଛି। ଏହି ମାମଲାରେ ଏପର୍ୟ୍ୟନ୍ତ ୨୩ ଜଣଙ୍କୁ ଗିରଫ କରାଯାଇଛି। ଏହି ସମୟରେ, ରିୟା ଚକ୍ରବର୍ତ୍ତୀ ଏନଡିପିଏସ୍ କୋର୍ଟରୁ ଏକ ବଡ଼ ଅସୁବିଧାର ସମ୍ମୁଖୀନ ହୋଇଛନ୍ତି। ତାଙ୍କ ଭାଇ ଶୋଭିକ ଚକ୍ରବର୍ତ୍ତୀଙ୍କୁ ଜାମିନ ପ୍ରଦାନ କରିବାକୁ କୋର୍ଟ ମନା କରି ଦେଇଛନ୍ତି। ଶୋଭିକ ଚକ୍ରବର୍ତ୍ତୀଙ୍କ ଜାମିନ ଆବେଦନକୁ ଏନ୍ଡିପିଏସ୍ କୋର୍ଟ ଖାରଜ କରି ନଭେମ୍ବର ୨ ପର୍ୟ୍ୟନ୍ତ ନ୍ୟାୟିକ ହେପାଜତକୁ ବୃଦ୍ଧି କରିଛନ୍ତି। ସୌବିକଙ୍କ ଜାମିନକୁ ବଢାଯାଇଦିଆ ଯାଇଛି । ଏହା ପରେ ଏନସିବି ତାଙ୍କୁ ପୁଣି କୋର୍ଟରେ ହାଜର କରିଥିଲା। ଶୋଭିକଙ୍କୁ ୪ ସେପ୍ଟେମ୍ବରରେ ଏନସିବି ଗିରଫ କରିଥିଲା। ୯ ସେପ୍ଟେମ୍ବର ପର୍ୟ୍ୟନ୍ତ ଏନସିବି ରିମାଣ୍ଡରେ ରହିବା ପରେ ଶୋଭିକଙ୍କୁ ନ୍ୟାୟିକ ହେପାଜତକୁ ପଠାଯାଇଥିଲା ଏବଂ ସେବେଠାରୁ ସେ ଜେଲରେ ଥିଲେ। ଡ୍ରଗ୍ସ ସଂଯୋଗରେ ଅର୍ଜୁନ ରାମପାଲଙ୍କ ଗର୍ଲଫ୍ରେଣ୍ଡ ଗାବ୍ରିଏଲା ଡେମେଟ୍ରିଏଡସର ଭାଇ ଆଗିସିଲୋସ ଡେମେଟ୍ରିଏଡଙ୍କୁ ମଧ୍ୟ ଏନସିବି ଗିରଫ କରିଛି। ନଭେମ୍ବର ୨ ସୁଦ୍ଧା ଆଜିସିଲୋସଙ୍କୁ ହେପାଜତକୁ ପଠାଯାଇଛି। ଅଭିଯୁକ୍ତଙ୍କୁ ଲୋନାଭଲାସ୍ଥିତ ଏକ ରିସୋର୍ଟରୁ ଏନସିବି ଦ୍ୱାରା ଗିରଫ କରାଯାଇଥିଲା। ତାଙ୍କଠାରୁ ଆଲପ୍ରାଜୋଲାମ ନାମକ ଡ୍ରଗ୍ସ ଉଦ୍ଧାର କରାଯାଇଛି, ଯାହା ଭାରତରେ ନିଷେଧ । ଉଲ୍ଲେଖନୀୟ ଯେ, ସୁଶାନ୍ତ ସିଂ ରାଜପୁତଙ୍କ ମୃତଦେହ ୧୪ ଜୁନ୍ ଦିନ ବାନ୍ଦ୍ରାସ୍ଥିତ ଏକ ଫ୍ଲାଟରୁ ମିଳିଥିଲା । ଏହାପୂର୍ବରୁ ମୁମ୍ବାଇ ପୋଲିସ ଏହି ମାମଲାର ତଦନ୍ତ କରିଥିଲା। ପରେ ସୁଶାନ୍ତଙ୍କ ପିତାଙ୍କ ଅଭିଯୋଗ ପରେ ବିହାର ପୋଲିସ କିଛି ଦିନ ଯାଞ୍ଚ କରିଥିଲା। କିନ୍ତୁ ପରେ ମାମଲା ସିବିଆଇକୁ ଆସିଥିଲା। ଏହା ପରେ ଇଡି, ସିବିଆଇ ଏବଂ ଏନସିବି ମିଳିତ ଭାବେ ଏହି ମାମଲାର ତଦନ୍ତ କରୁଛନ୍ତି।
