ମୁମ୍ବାଇ (ଏଟିଆର ବ୍ୟୁରୋ ): ଦୀପାବଳି ଆନନ୍ଦର ପର୍ବ ଆଲୋକର ପର୍ବ । ସାରା ଦେଶରେ ଏବେ ଖୁସିର ମାହୋଲ । ପୂରା ଦେଶରେ ଧୁମ ଧାମରେ ପାଳନ ହେଉଛି ଦୀପାବଳି । ଏଥିରୁ ବଲିଉଡ ସେଲିବ୍ରେଟି ମାନେ କେମିତି ବାଦ ପଡିଥାନ୍ତେ । ବି-ଟାଉନ ସେଲିବ୍ରେଟମାନେ ଅଧିକ ଉତ୍ସାହିତ ଥିବା ବେଳେ ତାହାଠାରୁ ଅଧିକ ଉତ୍ସାହିତ ଅଛନ୍ତି ବଲିଉଡର ୩ଟି ନୂଆ ଯୋଡି । ବିବାହ ପରେ ସେମାନଙ୍କର ପ୍ରଥମ ଦୀପାବଳୀ ହୋଇଥିବାରୁ ସେମାନେ ଅଛନ୍ତି ଅଧିକ ଖୁସି ।
ରାମଲୀଲା ଯୋଡି କୁହାଯାଉଥିବା ରଣବୀର ଓ ଦୀପିକା ଛଅ ବର୍ଷରୁ ଅଧିକ ସମୟ ହେବ ଦୁହେଁ ଦୁହିଁକୁ ଡେଟିଂ କରୁଥିଲେ । ତେବେ ୨୦୧୮ ନଭେମ୍ବରରେ ସେମାନେ ବିବାହ କରିଥିଲେ । ଏହା ପୂର୍ବରୁ କୌଣସି ବି ଦୀପାବଳିରେ ସେମାନେ ଏକାଠି ଦେଖାଯାଇନଥିବା ବେଳେ ବିବାହ ପରେ ପ୍ରଥମଥର ପାଇଁ ଦୀପାବଳି ଏକାଠି ପାଳିବେ ।
ସେହିଭଳି ବଲିଉଡର ଦେଶୀଗର୍ଲ କୁହାଯାଉଥିବା ପ୍ରିୟଙ୍କା ଚୋପ୍ରାଙ୍କର ଏହା ବିବାହ ପରେ ପ୍ରଥମ ଦୀପାବଳି ଅଟେ । ୨୦୧୮ ଡିସେମ୍ବରରେ ପ୍ରିୟଙ୍କା ଆମେରିକୀୟ ପପ୍ ସିଙ୍ଗର ନିକ୍ ଜୋନସଙ୍କୁ ଉଭୟ ହିନ୍ଦୁ ଓ ଖ୍ରୀଷ୍ଟିଆନ ରିତିନୀତିରେ ବିବାହ କରିଥିଲେ । ନିକ୍ ଜଣେ ଖ୍ରୀଷ୍ଟିଆନ ହୋଇଥିବା ସତ୍ତ୍ୱ ଭାରତୀୟ ସଂସ୍କୃତି ପ୍ରତି ଆଗ୍ରହୀ ଥିବା ହେତୁ ସେ ପ୍ରିୟଙ୍କାଙ୍କ ସହ ସବୁ ରୀତିନିତୀ ପାଳିଥାଆନ୍ତି । କିଛିଦିନ ତଳେ ପ୍ରିୟଙ୍କା ନିକ୍ଙ୍କ ସହ ପ୍ରଥମ କରୱା ଚାନ୍ଦ ପାଳିଥିବା ବେଳେ ଏବେ ପ୍ରଥମ ଦୀପାବଳି ପାଳନ କରିବେ ।
କମେଡି କିଙ୍ଗ କୁହାଯାଉଥିବା କପିଲ ଶର୍ମା ଗତବର୍ଷ ଡିସେମ୍ବରରେ ଗିନିକୁ ବିବାହ କରିଥିବା ବେଳେ ଏହା ତାଙ୍କର ପ୍ରଥମ ଦୀପାବଳି ଅଟେ । ଏହି ଦୀପାବଳି ଏଥିପାଇଁ ମଧ୍ୟ ଖାସ ଅଟେ ଯେହେତୁ ଖୁବ ଶୀଘ୍ର କପିଲ ବାପା ହେବାକୁ ଯାଉଛନ୍ତି । ସେଥିପାଇଁ ନିଜ ପରିବାର ଓ ବନ୍ଧୁ ବାନ୍ଧବଙ୍କ ସହ ସେ ଏହାକୁ ପାଳିବେ ବୋଲି ଜଣା ପଡିଛି ।
