ନୂଆଦିଲ୍ଲୀ ( ଏଟିଆର ବ୍ୟୁରୋ) : ଦକ୍ଷିଣ ଦିଲ୍ଲୀର ଜାକିରନଗର ଅଞ୍ଚଳରେ ଭୟାବହ ଅଗ୍ନିକାଣ୍ଡ ହୋଇଛି । ଜାକିରନଗର ଅଞ୍ଚଳରେ ଆପାର୍ଟମେଣ୍ଟରେ ନିଆଁ ଲାଗିଯାଇଥିବାରୁ ଏଭଳି ଦୁଃଖଦ ଘଟଣା ସାମ୍ନାକୁ ଆସିଛି । ଅଗ୍ନିକାଣ୍ଡରେ ୫ ଜଣଙ୍କର ମୃତ୍ୟୁ ହୋଇଥିବାବେଳେ ୧୧ ଜଣ ଗୁରୁତର ଆହତ ହୋଇଛନ୍ତି । ସମସ୍ତ ଗୁରୁତରମାନଙ୍କୁ ଉଦ୍ଧାର କରାଯାଇ ସ୍ଥାନୀୟ ଡାକ୍ତରଖାନାରେ ଭର୍ତ୍ତି କରାଯାଇଛି । ଖବର ପାଇ ଘଟଣାସ୍ଥଳରେ ୮ଟି ଦମକଳ ବାହିନୀ ପହଞ୍ଚି ନିଆଁ ଲିଭାଇବା କାର୍ଯ୍ୟରେ ଲାଗିଥିଲେ ।
ଏପର୍ଯ୍ୟନ୍ତ ନିଆଁ ଲିଭା କାର୍ୟ୍ୟ ଜାରି ରହିଥିବା ଜଣାପଡିଛି । ମୃତ୍ୟୁ ସଂଖ୍ୟା ବଢି ପାରେ ବୋଲି ଆଶଙ୍କା କରାଯାଉଛି । ଅଗ୍ନିକାଣ୍ଡର କାରଣ ଜଣାପଡ଼ିନଥିଲେ ବି ସର୍ଟ ସର୍କିଟରୁ ଅଗ୍ନିକାଣ୍ଡ ହୋଇଥିବା ଅନୁମାନ କରାଯାଉଛି । ନିଆଁ ଏତେ ଜୋରରେ ଲାଗିଥିଲା ଯେ ବହୁ ସଂଖ୍ୟାରେ ଗାଡି ମଧ୍ୟ ପୋଡି ପାଉଁଶ ହୋଇଯାଇଥିଲା । ଅଗ୍ନିକାଣ୍ଡରେ କୋଠାର ପାର୍କିଂ ସ୍ଲଟରେ ଥିବା ୭ଟି କାର୍ ଏବଂ ୮ଟି ମୋଟର ସାଇକେଲ୍ ମଧ୍ୟ ଜଳିଯାଇଛି । ୮ଟି ଦମକଳ ଗାଡି ଘଟଣାସ୍ଥଳରେ ପହଞ୍ଚି ନିଆଁ ଲିଭାଇବା ପାଇଁ ଉଦ୍ୟମ ଜାରି ରଖିଛନ୍ତି ।
ପ୍ରଥମେ ତଳ ମହଲରେ ନିଆଁ ଲାଗିଥିଲା । ପରେ ଦେଖୁ ଦେଖୁ ଏହା ଉପର ମହଲା ଯାଏଁ ବ୍ୟାପିଯାଇଥିଲା । ଦକ୍ଷିଣ ଦିଲ୍ଲୀର ଏହି ଅଂଚଳରେ ବହୁ ସଂଖ୍ୟାରେ ଲୋକ ରହୁଥିବାବେଳେ ରାସ୍ତା ଅଣଓସାରିଆ ଥିଲା ଯାହାଫଳରେ ଦମକଳ ବାହିନୀ ଠିକ ସମୟରେ ପହଞ୍ଚିପାରୁନଥିଲା । ଦିଲ୍ଲୀ ପୁଲିସ୍ ଘଟଣାସ୍ଥଳରେ ପହଞ୍ଚି ତଦନ୍ତ କରୁଛି।
