ମୁମ୍ବାଇ(ଏଟିଆର ବ୍ୟୁରୋ): ବଲିଉଡର ଚର୍ଚ୍ଚିତ ଚଳଚ୍ଚିତ୍ର ନିର୍ମାତା ଏକତା କପୁରଙ୍କ ବ୍ୟାଗରୁ ଚୋରି ହୋଇଛି ଟଙ୍କା । ଏନେଇ ସେ ମୁମ୍ବାଇ ଜୁହୁ ପୋଲିସ ଷ୍ଟେସନରେ ଲିଖିତ ଅଭିଯୋଗ କରିଛନ୍ତି । ତାଙ୍କ ହ୍ୟାଣ୍ଡବ୍ୟାଗରୁ ନଗଦ ୬୦୦୦୦ ଟଙ୍କା ଚୋରି ହୋଇଥିବାର ସେ ଅଭିଯୋଗ କରିଛନ୍ତି । ପୋଲିସ ଏନେଇ ମାମଲା ରୁଜୁ କରିବା ସହ ଘଟଣାର ତଦନ୍ତ ଆରମ୍ଭ କରିଛି ।
ଅଭିଯୋଗ ପତ୍ରରେ ଏକତା ନିଜ ବାସଭବନ ଜୁହୁ ବଙ୍ଗଳାରୁ ଏହି ଟଙ୍କା ଚୋରି ହୋଇଥିବା ଦର୍ଶାଇଛନ୍ତି । ତାଙ୍କ ବଙ୍ଗଳାର କୌଣସି କର୍ମଚାରୀ କିମ୍ବା ଅନ୍ୟ କେହି ଏଥିରେ ସମ୍ପୃକ୍ତ ରହିଥିବା ପୋଲିସ ସନ୍ଦେହ କରୁଛି । ଏକତା ତାଙ୍କ ବ୍ୟାଗରେ ଦେଢ ଲକ୍ଷ ଟଙ୍କା ରଖିଥିବା ବେଳେ ପରେ ସେଥିରୁ ୬୦୦୦୦ ଟଙ୍କା ନଥିବାର ଜାଣିବାକୁ ପାଇଲେ । ସେପଟେ ଘରେ ଲାଗିଥିବା ସିସିଟିଭି ଫୁଟେଜକୁ ଆଧାର କରି ଜଣେ ବ୍ୟକ୍ତିଙ୍କୁ ଅଟକ ରଖି ପୋଲିସ ପଚରାଉଚରା ଚଳାଇଛି ।
