ଶ୍ରୀନଗର ( ଏଟିଆର ବ୍ୟୁରୋ): ଜାମ୍ମୁକାଶ୍ମୀରରେ ସୁରକ୍ଷାବଳ ଓ ଆତଙ୍କବାଦୀଙ୍କ ମଧ୍ୟରେ ଗୁଳି ବିନିମୟ ହୋଇଛି । ଏଥିରେ ଦୁଇ ଜଣ ଆତଙ୍କବାଦୀ ନିହତ ହୋଇଥିବା ସୂଚନା ମଳିଛି । ବାନ୍ଦୀପୋରା ଜିଲ୍ଲା ଲାଡୁରା ଗାଁରେ ସେନା ଦ୍ୱାରା ସର୍ଚ୍ଚ ଅପରେସନ ଚାଲୁଥିବା ବେଳେ ଗୁଳି ବିନିମୟ ହୋଇଥିଲା । ଗତକାଲି ଉକ୍ତ ଅଞ୍ଚଳରେ ଆତଙ୍କବାଦୀ ମାନେ ଲୁଚି ରହିଥିବା ସେନାକୁ ଗୁପ୍ତ ସୂଚନା ମିଳିଥିଲା । ଏହାକୁ ଆଧାର କରି ସେନା ପକ୍ଷରୁ ଏହି ଗାଁରେ ସର୍ଚ୍ଚ ଅପରେସନ ଆରମ୍ଭ ହୋଇଥିଲା ।
ଲୁଚିଥିବା ସ୍ଥାନକୁ ସେନାବାହିନୀ ଘେରା ବନ୍ଦୀ କରିବା ପରେ ସୁରକ୍ଷା କର୍ମୀଙ୍କ ଉପରକୁ ଆତଙ୍କୀ ଗୁଳି ବର୍ଷା କରିଥିଲେ, ଯାହାର ମୁହଁ ତୋଡ ଜବାବ ଦେଇଥିଲେ ସୁରକ୍ଷାବଳ । ଉଭୟ ଆତଙ୍କବାଦୀ ଓ ସୁରକ୍ଷାକର୍ମୀଙ୍କ ମଧ୍ୟରେ ଗୁଳିବିନିମୟ ଲାଗି ରହିଥିଲା । ଶେଷରେ ରବିବାର ବିଳମ୍ବିତ ରାତିରେ ସୁରକ୍ଷାକର୍ମୀଙ୍କ ଗୁଳିରେ ଜଣେ ଆତଙ୍କବାଦୀ ନିହତ ହୋଇଥିବା ବେଳେ ଆଜି ସକାଳେ ଆଉ ଜଣେ ଆତଙ୍କୀ ନିହତ ହୋଇଛି ।
