ମୟୁରଭଞ୍ଜ( ଏଟିଆର ବ୍ୟୁରୋ ) ; ବାଇକକୁ ମୁହାଁ ମୁହିଁ ଧକ୍କା ଦେଲା ବସ । ଫଳରେ ଚାଲିଗଲା ଗୋଟିଏ ନିରୀହ ଜୀବନ । ଏଭଳି ଅଭାବନୀୟ ଘଟଣା ମୟୂରଭଞ୍ଜ ଜିଲ୍ଲା ରାଇରଙ୍ଗପୁର କଲେଜ ଛକରେ ଘଟିଛି । ଆଜି ସକାଳ ୮ ଟା ସମୟରେ ଏଭଳି ଦୁର୍ଘଟଣା ଘଟିଥିବାର ଜଣାପଡିଛି । ବସ୍ଟି କରଞ୍ଜିଆରୁ ଟାଟା ଯାଉଥିଲା ବେଳେ ବାଇକ ସହ ଦୁର୍ଘଟଣା ଘଟିଥିଲା । ତେବେ ବାଇକରେ ୩ ଜଣଙ୍କ ମଧ୍ୟରୁ ଜଣେ ବୃଦ୍ଧାଙ୍କ ମୃତ୍ୟୁ ଘଟିଥିବା ଜଣାପଡିଛି । ସେହିପରି ମୃତ ବୃଦ୍ଧାଙ୍କ ନିଜ ଝିଅ ଏବଂ ଜ୍ୱାଇଁ ଗୁରୁତର ଭାବେ ଆହତ ହୋଇଛନ୍ତି । ସେମାନଙ୍କୁ ରାଇରଙ୍ଗପୁର ହସ୍ପିଟାଲରେ ଭର୍ତ୍ତି କରାଯାଇଥିବା ଜଣାପଡିଛି । ମୃତ ବୃଦ୍ଧା ଜଣକ ହେଲେ ବାଚା ସୋରେନ୍ । ତେବେ ଏଭଳି ଦୁଃଖଦ ଦୁର୍ଘଟଣା କୁ ନେଇ ଘଟଣାସ୍ଥଳରେ ଉତ୍ତେଜନା ପ୍ରକାଶ ପାଇଛି । ଅନ୍ୟପଟେ ଦୁର୍ଘଟଣା ଘଟାଇଥିବା ବସ ଡ୍ରାଇଭର ଘଟଣାସ୍ଥଳରୁ ଫେରାର ହୋଇଯାଇଛି ।
