ଭୁବନେଶ୍ୱର,(ଏଟିଆର ବ୍ୟୁରୋ): ରାଜଧାନୀରେ ପୁଣି ଅଗ୍ନିକାଣ୍ଡ । ଏଥର କୌଣସି ସାଧାରଣ ସ୍ଥାନରେ ନୁହେଁ ବରଂ ଖୋଦ ଥାନା ପରିସରରେ । ଏମିତି ଅଭାବନୀୟ ଘଟଣା ଘଟିଛି କ୍ୟାପିଟାଲ ଥାନା ବ୍ୟାରେକରେ । ଅଗ୍ନିକାଣ୍ଡର ପ୍ରଭାବ ତୀବ୍ର ଥିବା ଯୋଗୁ ବ୍ୟାରେକରେ ଥିବା ସମସ୍ତ ଅସବାପତ୍ର ପୋଡି ଛାରଖାର ହୋଇଯାଇଥିବା ସୂଚନା ମିଳିଛି ।
ଖବର ପାଇ ଅଗ୍ନିଶମ ବିଭାଗ ଘଟଣାସ୍ଥଳରେ ପହଞ୍ଚି ନିଆଁକୁ ଆୟତ କରିବା ସହ ଘଟଣାସ୍ଥଳରେ ଫସିଥିବା ଜଣେ ଯବାନଙ୍କୁ ଉଦ୍ଧାର କରିଛନ୍ତି । ଧୂଆଁପୂର୍ଣ୍ଣ ପାଇଖାନା ଭିତରେ ଅଣନିଶ୍ୱାସି ହୋଇ ପଡିଥିଲେ ଜବାନ ଜଣଙ୍କ । ତାଙ୍କୁ ତୁରନ୍ତ ଚିକିତ୍ସା ଲାଗି କ୍ୟାପିଟାଲ ହସ୍ପିଟାଲକୁ ପଠାଇ ଦିଆଯାଇଛି । ବ୍ୟାରେକ୍ ଭତରେ ଭୟାବହ ନିଆଁ ଦେଖି ପୁଲିସ କର୍ମଚାରିଙ୍କ ଭିତରେ ଛନକା ପଶିଛି । ସର୍ଟସର୍କିଟ ଯୋଗୁ ଏହି ଅଘଟଣ ଘଟିଥିବା ଜଣାପଡିଛି ।
ତେବେ ଅଗ୍ନିଶମ ବିଭାଗ ପକ୍ଷରୁ ବିଭିନ୍ନ ପ୍ରତିଷ୍ଠାନ ଗୁଡିକରେ ଅଗ୍ନିନିରାପତ୍ତା ଉପକରଣ ଲଗାଇବାକୁ ବାଧ୍ୟତାମୂଳକ ହୋଇଥିବା ବେଳେ ଥାନାଗୁଡିକରେ ଏହି ବ୍ୟବସ୍ଥା ଗ୍ରହଣ କରାଯାଇଥିଲା କି ନାହିଁ ତାହା ତଦନ୍ତ ପରିସରଭୂକ୍ତ ହେଉ ବୋଲି ଦାବି ହୋଇଛି ।
