କେନ୍ଦୁଝର,(ଏଟିଆର ବ୍ୟୁରୋ): ବିଚ ରାସ୍ତାରେ ଏକ ଟ୍ରକ ହୁତୁହୁତୁ ହୋଇ ଜଳିଯାଇଛି । ଯଦିଓ ଏଥିରେ ଅଳ୍ପକେ ଡ୍ରାଇଭର ଓ ହେଲପର ରକ୍ଷା ପାଇ ଯାଇଛନ୍ତି କିନ୍ତୁ ଘଟଣାକୁ ନେଇ ପୂରା ଅଞ୍ଚଳରେ ଖେଳିଯାଇଛି ଆତଙ୍କ । ଏଭଳି ଏକ ଘଟଣା ଘଟିଛି କେନ୍ଦୁଝର ଜିଲ୍ଲା ୪୯ ନମ୍ବର ଜାତୀୟ ରାଜପଥରେ ।
ତେବେ ନିଆଁ ଲାଗିବାର କାରଣ ଜଣାପଡିନାହିଁ । ଅନୁମାନ କରାଯାଉଛି ସଟସର୍କିଟ ଯୋଗୁ ଏଭଳି ଘଟଣା ଘଟିଛି । ଅଗ୍ନିଶମ ବିଭାଗ ପହଞ୍ଚି ନିଆଁକୁ ଆୟତ କରିଥିବା ବେଳେ ପୁଲିସ ଗାଡିକୁ ଜବତ କରି ଘଟଣାର ତଦନ୍ତ କରୁଛି । ଏହି ଘଟଣାକୁ ନେଇ ବେଶ କିଛି ସମୟ ଟ୍ରାଫିକ ସମସ୍ୟା ଦେଖାଦେଇଥିଲା । ରିପୋର୍ଟ ଅନୁସାରେ, ଏକ ୧୦ଚକିଆ ଟ୍ରକ ସିମେଣ୍ଟ ବୋଝେଇ କରି ଆସୁଥିବା ବେଳେ ଅଚାନକ ଝନବେଳଦା ପାଖରେ ଗାଡି ତଳୁ ଧୂଆଁ ବାହାରୁଥିବା ଦେଖିବାକୁ ମିଳିଥିଲା ।
ହେଲପର ଓ ଡ୍ରାଇଭର ଜୀବନବିକଳେ ଟ୍ରକରୁ ଓହ୍ଲାଇପଡିଥିଲେ । ବାସ ଏହାପରେ ଚାହୁଁଚାହୁଁ ଜଳିବାକୁ ଲାଗିଥିଲା ଟ୍ରକ । ନିଆଁ ଏତେ ଜୋରରେ ମାଡିଥିଲା ଯେ ଟ୍ରକଟି ପୂରା ଜଳିଯାଇଛି । ଏଥିରେ ଟ୍ରକରେ ଥିବା ସମସ୍ତ ସିମେଣ୍ଟ ମଧ୍ୟ ନଷ୍ଟ ହୋଇଯାଇଥିବା ଜଣାପଡିଛି । ଖବର ପାଇ ଅଗ୍ନିଶମ ବିଭାଗ କର୍ମଚାରୀମାନେ ପହଞ୍ଚି ନିଆଁକୁ ଆୟତ କରିବା ସହ ଘଟଣାର ତଦନ୍ତ ଆରମ୍ଭ କରିଛନ୍ତି ।
