ସ୍ନେହଲତା ଫିଲ୍ମ କ୍ରାଫ୍ଟସ୍ ବ୍ୟାନରରେ ନିର୍ମିତ ଓଲିଉଡ ଫିଲ୍ମ ‘ଶକ୍ତି-ଦ ଲାୟନ ହାର୍ଟ’ର ଅଡିଓ ରବିବାର ରିଲିଜ ହୋଇଯାଇଛି । ସଂଗୀତକାର ଅଭିଜିତ ମଜୁମଦାର ଓ ଡ଼ଃ ନିର୍ମଳ ନାୟକଙ୍କ ଯୋଡି ଚଳଚ୍ଚିତ୍ର ‘ଶକ୍ତି-ଦ ଲାୟନ ହାର୍ଟ’ ଏବର୍ଷ ନଂ-୧ ଫିଲ୍ମ ହେବ ବୋଲି ସେମାନେ ମତ ରଖିଛନ୍ତି । ଏହି ଫିଲ୍ମରେ କଣ୍ଠଦାନ କରିଛନ୍ତି ହ୍ୟୁମାନ ସାଗର, ଅଭିଜିତ୍ ମଜୁମଦାର, ମାଧବ, ସ୍ମୃତିମୟୀ ଓ ସତ୍ୟଜିତ୍ ।
ଏହି ଅବସରରେ ବାଣୀବିହାର ସ୍ଥିତ ହୋଟେଲ ଶୀତଲରେ ସୁଜିତ୍ ସାହୁ, ରୋନକ ସାହୁ, ମିନତୀ ସାହୁ, ରଣଜିତ୍ ପଟ୍ଟନାୟକ, ସୁଧାକର ବସନ୍ତ, କରଣ, ସୁର୍ମୟୀ, ମିହିରଦାସ, ପିଁଟୁ ନନ୍ଦ, ଗୁଡୁ ଏବଂ ପ୍ରଣୟ ସେଠୀ ପ୍ରମୁଖ ଉପସ୍ଥିତ ରହି ଅଡିଓଟିର ଶୁଭାରମ୍ଭ କରିଥିଲେ । ଶେଷରେ ଅଭିଜିତ୍ ମଜୁମଦାର ଏବଂ ସ୍ମୃତିମୟୀଙ୍କ କଣ୍ଠରେ ‘ଗୁଡିରେ ଗୁଡି’ ଗୀତରେ ଏକ ଧମାକାଦାର ନୃତ୍ୟ ପରିବେଷଣ ହୋଇଥିଲା । ଏହାର ପରିଚାଳନା ଦାୟିତ୍ୱରେ ଥିଲେ ଆଙ୍କର ଅଙ୍କିତା ମହାନ୍ତି ।
ସୁଧାକାର ବସନ୍ତ ଦ୍ୱାରା ନିର୍ଦ୍ଦେଶିତ ଫିଲ୍ମ ‘ଶକ୍ତି-ଦ ଲାୟନ ହାର୍ଟ’ରେ ଦର୍ଶକମାନେ ଆକ୍ସନ ଦେଖିବାକୁ ପାଇବେ । ଏହାର ମୁଖ୍ୟ ଭୂମିକାରେ ନବାଗତ ହିରୋ କରଣ ଥିବା ବେଳେ ତାଙ୍କ ବିପକ୍ଷରେ ‘ମୁ ବି ହିରୋଇନ ହେବି-୨’ର ବିଜୟିନୀ ସୂର୍ଯ୍ୟମୟୀ ମହାପାତ୍ର । ଏମାନଙ୍କ ବ୍ୟତୀତ ଏହି ଫିଲ୍ମରେ ଉତ୍ତମ ମହାନ୍ତ, ଅପରାଜିତା ମହାନ୍ତି, ମିହିର ଦାସ, ପପୁ ପମପମ, ପପି, ରାଜିବ ମହାନ୍ତି, ବିଜୁ , ମଧୁ, ପିଁଟୁ ନନ୍ଦ ପ୍ରମୁଖ କଳାକାର ମାନଙ୍କୁ ଦେଖିବାକୁ ମିଳିବ ।
