ସୁନ୍ଦରଗଡ଼,(ଏଟିଆର ବ୍ୟୁରୋ): ସୁନ୍ଦରଗଡ଼ ଜିଲ୍ଲା କୁତ୍ରା ବଜାର ନିକଟରେ ଘଟିଛି ଏକ ମର୍ମନ୍ତୁଦ ଦୁର୍ଘଟଣା । ଭାରସାମ୍ୟ ହରାଇ ଫୁଟପାଥ ଉପରେ ଏକ ଟ୍ରକ ଚଢ଼ିଯିବାରୁ ଘଟଣାସ୍ଥଳରେ ୩ଜଣଙ୍କ ମୃତ୍ୟୁ ହୋଇଛି । ବିଳମ୍ବିତ ରାତିରେ ଘଟିଥିବା ଏହି ଘଟଣାକୁ ନେଇ ମୃତ୍ୟୁ ଏମିତି ବି ଆସେ ବୋଲି ଲୋକେ ହତବାକ ହୋଇଯାଇଛନ୍ତି । ଦୁର୍ଘଟଣାରେ ଆଖି ବୁଜିଥିବା ସମସ୍ତେ ବ୍ୟବସାୟୀ ଓ ସେମାନଙ୍କ ଘର ଉତ୍ତରପ୍ରଦେଶ ବୋଲି ଜଣାପଡିଛି ।
ମୃତକମାନେ ହେଲେ ଦିଲେଦାର ସୋନକର, ଉଜ୍ୱଳ ସୋନକର ଓ ବିଜେଶ ମହୁରିଆ । ସମସ୍ତେ ଏଠାରେ ଜୁସ ଦୋକାନ କରି ପରିବାର ଚଳାଉଥିଲେ । ସେପଟେ ଏହି ଘଟଣାରେ ପୁଲିସ ଦୁର୍ଘଟଣା ଘଟାଇଥିବା ଟ୍ରକକୁ ଜବତ କରି ତଦନ୍ତ ଆରମ୍ଭ କରିଛି । ରିପୋର୍ଟ କହୁଛି ଗତକାଲି ରାତିରେ ବେପାର ସାରି ଏମାନେ ବସଷ୍ଟାଣ୍ଡ ପାଖରେ ଥିବା ଏକ ଫୁଟପାଥରେ ସବୁଦିନ ଭଳି ଶୋଇଥିଲେ । ତେବେ ରାତି ପ୍ରାୟ ସାଢ଼େ ୧ଟାରୁ ୨ଟା ହେବ । ଏହି ସମୟରେ ରାଉରକେଲାରୁ କୋକାକୋଲା ବୋଝେଇ କରି ସୋନପୁର ଯାଉଥିବା ଏକ ଟ୍ରକ ଅଚାନକ ଭାରସାମ୍ୟ ହରାଇ ଫୁଟପାଥ ଉପରକୁ ମାଡିଯାଇଥିଲା । ଆଉ ସମସ୍ତେ ଟ୍ରକ ତଳେ ଚାପି ହୋଇଯାଇଥିଲେ ।
