ବଲାଙ୍ଗୀର (ଏଟିଆର ବ୍ୟୁରୋ): ସାହା ହେଲାନି କାଳିଆ! ଠକି ଦେଲା ସିଏ ଅଧାବାଟରେ । କାଳିଆର ଦର୍ଶନ ପାଇଁ କେତେ ଆଶା ନେଇ ବାହାରିଥିଲେ । ଭାବିଥିଲେ କାଳିଆକୁ ଭେଟିବୁ ନିଜ ଦୁଃଖ ଜଣାଇବୁ । ହେଲେ ଦଘା ଦିଆ କାଳିଆ ଠକି ଦେଲା ଅଧାରାସ୍ତାରେ । ସଡକ ଦୂର୍ଘଟଣାରେ ଚାଲିଗଲା ଜୀବନ । ପୁରୀ ଶ୍ରୀକ୍ଷେତ୍ର ଦର୍ଶନ ପାଇଁ ଗୋଟିଏ ଗାଁର ୧୫ ଜଣ ଲୋକ ଆସୁଥିବା ବେଳେ ବଲାଙ୍ଗୀର ସୋନପୁର ବାଇପାସ ରାସ୍ତା ନିକଟରେ ଦୁର୍ଘଟଣାଗ୍ରସ୍ତ ହୋଇଛି ।
ସୂଚନା ଅନୁସାରେ ଗତକାଲି ବିଳମ୍ବିତ ରାତିରେ ଏକ ବୋଲେର ଗାଡିରେ ବଲାଙ୍ଗୀର ଜିଲ୍ଲା ପାଟଣାଗଡ ଥାନା ଅନ୍ତର୍ଗତ ଘୁମେର ଗାଁର ୧୫ ପୁରୁଷ ମହିଳା ଏକ ବୋଲେର ଗାଡିରେ ପୁରୀ କାଳିଆ ଦର୍ଶନ ଅଭିମୁଖେ ବାହାରିଥିଲେ । ସେମାନେ ଆସୁଥିବା ବେଳେ ବାଇପାସ ନିକଟରେ ଏକ ଥୁଆ ହୋଇଥିବା ଟ୍ରକକୁ ତାଙ୍କ ଗାଡି ଧକ୍କା ଦେଇଥିଲା । ଫଳରେ ଘଟଣା ସ୍ଥଳରେ ୨ ଜଣଙ୍କର ମୃତ୍ୟୁ ହୋଇଛି । ୭ ଜଣ ଗୁରୁତର ଆହତ ହୋଇଛନ୍ତି । ମୃତକ ଦ୍ୱୟ ହେଲେ ଶକୁନ୍ତଳା ସାହୁ ଓ ତେଜ ବାଗ । ଆହତମାନେ ଭୀମଭୋଇ ହସପିଟାଲରେ ଭର୍ତ୍ତି ହୋଇଛନ୍ତି । ରାତିରେ ଘନ କୁହୁଡି ଯୋଗୁ ଏହି ଦୁର୍ଘଟଣା ହୋଇଥିବା ଅନୁମାନ କରାଯାଉଛି ।
