ରାଉରକେଲା (ଏଟିଆର ବ୍ୟୁରୋ); ୪ ବର୍ଷର ନିଷ୍ପାପ ଶିଶୁକୁ ଦୁଷ୍କର୍ମ ଅଭିଯୋଗରେ ପୋଲିସ ଜଣେ ୩୦ ବର୍ଷୀୟ ଯୁବକକୁ ଗିରଫ କରିଛି । ଗିରଫ ଅଭିଯୁକ୍ତ ହେଲା ସଂଜୟ ଡୁଙ୍ଗୁଡୁଙ୍ଗୁ । ତା ଘର ସୁନ୍ଦରଗଡ ଜିଲ୍ଲା ରାଏବୋଗା ଥାନା ଅନ୍ତର୍ଗତ ଗପୁରଗାଁରେ । ସେପଟେ ଦୁଷ୍କର୍ମର ଶିକାର ହୋଇଥିବା ଶିଶୁଟି ଆଇଜିଏଚ ମେଡିକାଲରେ ଜୀବନ ମରଣ ସହ ସଂଗ୍ରାମ କରୁଛି । ପୋଲିସ ଘଟଣାର ତଦନ୍ତ ଆରମ୍ଭ କରିଛି ।
ସୂଚନା ଅନୁଯାୟୀ ସଞ୍ଜୟ ଚକୋଲେଟ ଦେବା ବାହାନାରେ ନାବାଳିକାକୁ ଦଷ୍କର୍ମ କରିଛି । ଚକୋଲେଟ ଦେବି ବୋଲି କହି ନାବାଳିକାକୁ ଗାଡିରେ ବସାଇ ଗାଁଠାରୁ ଦୂରକୁ ନେଇ ଯାଇଥିଲା ଅଭିଯୁକ୍ତ । ଗାଁରୁ ଟିକେ ଦୂରକୁ ଯିବା ପରେ ପଡିଆରେ ଦୁଷ୍କର୍ମ କରିଥିଲା । ଛୋଟ ଛୁଆଟି ସେନ୍ସ ହରାଇ ପଡିଯିବା ପରେ ମରିଗଲା ଭାବି ସେଠାରେ ଛାଡି ଦେଇ ସଂଜୟ ଫେରାର ହୋଇ ଯାଇଥିଲା । ପଡିଆରେ ଝିଅଟି ପଡିଥିବା ଦେଖି ସ୍ଥାନୀୟ ଲୋକ ପ୍ରଥମେ ନିକଟସ୍ଥ ପ୍ରାଥମିକ ଚିକିତ୍ସାଳୟରେ ଭର୍ତ୍ତି କରିଥିଲେ । ପରେ ଅବସ୍ଥା ସଙ୍କଟାପର୍ଣ୍ଣ ହେବାରୁ ତାକୁ ଆଇଜିଏଚ ଡାକ୍ତରଖାନାକୁ ସ୍ଥାନାନ୍ତରିତ କରାଯାଇଛି । ତେବେ ଏଭଳି କାଣ୍ଡ ଘଟାଇ ଗାଁରୁ ଫେରାର ହେଇଯାଉଥିବା ବେଳେ ଗାଁ ଲୋକ ସଂଜୟକୁ ଧରି ପୋଲିସ ଜିମା ଦେଇଥିଲେ ।
