ପାରଳାଖେମୁଣ୍ଡି(ଏଟିଆର ବ୍ୟୁରୋ): ଘରେ ରାଗିକି ହେଉ କିମ୍ବା ଅନ୍ୟ କୌଣସି କାରଣରୁ ହେଉ ବହୁ ସମୟରେ ଛୋଟ ପିଲା ମାନେ ଘରୁ କେଉଁ ଆଡେ ପଳାଇବା ଘଟଣା ଆଗରୁ ଦେଖିବାକୁ ମିଳିଛି । ସେହିଭଳି ଗତ କାଲି ୫ ଜଣ ଛାତ୍ର ଘରୁ ସ୍କୁଲକୁ ବାହାରି ଆଉ ଘରକୁ ଫେରି ନାହାନ୍ତି । ସୂଚନା ଅନୁସାରେ ଗଜପତି ଜିଲ୍ଲା ଗୁରାଣ୍ଡି ଥାନା ଅନ୍ତର୍ଗତ ଜଙ୍ଗଲ ପଡୁ ଗାଁରୁ ୫ଜଣ ଛାତ୍ର ନିଖୋଜ ହୋଇଯାଇଛନ୍ତି ।
ସେମାନେ ହେଲେ କାହ୍ନା ନାୟକ, ବିକ୍ରମ ଜେନା, ଶୁଭମ୍ ଜେନା, ଚିନ୍ମୟ ଜେନା ଓ ଡମ୍ବୁରୁ ନାୟକ। ଏହି ଛାତ୍ର ମାନେ ସକାଳ ୯ଟା ବେଳେ ସ୍କୁଲକୁ ଯାଉଛନ୍ତି କହି ଘରୁ ବାହାରିଥିଲେ । ହେଲେ ଆଉ ଘରକୁ ଫେରିନଥିଲେ । ସେମାନଙ୍କ ପରିବାର ବର୍ଗ ବହୁ ଖୋଜା ଖୋଜି କଲା ପରେ ଗୁରାଣ୍ଡି ଥାନାରେ ଅଭିଯୋଗ କରିଛନ୍ତି । ଏହି ୫ଜଣ ଛାତ୍ର ଭିନ୍ନ ଭିନ୍ନ ସ୍କୁଲରେ ୧୦ ଶ୍ରେଣୀରେ ପାଠ ପଢନ୍ତି । ପରିବାର ଲୋକ ଛାତ୍ର ମାନେ ଆନ୍ଧ୍ରପ୍ରଦେଶ ପଳାଇ ଥିବା ସନ୍ଦେହ କରୁଛନ୍ତି । ପୋଲିସ ଏକ ନିଖୋଜ ମାମଲା ରୁଜୁ କରି ଛାତ୍ର ମାନଙ୍କୁ ଖୋଜିବା ପାଇଁ ଏକ ଟିମ ଗଠନ କରିଛି ।
