ଉମରକୋଟ (ଏଟିଆର ବ୍ୟୁରୋ): ଚାଲିଛି ପାର୍ବଣ ଋତୁ । ଏହି ଅବସରରେ ରାଜ୍ୟର ବିଭିନ୍ନ ସହରରେ ହୋଇଥିବା ପୂଜା ପେଣ୍ଡାଲରେ ମା’ଙ୍କୁ ଦର୍ଶନ କରିବା ଲାଗି କୋଣ ଅନୁକୋଣରୁ ଛୁଟି ଆସୁଛନ୍ତି ଭକ୍ତ । ସେହିଭଳି ଦୁଇଜଣ ଭକ୍ତ ମା’ଙ୍କୁ ଦର୍ଶନ କରିବା ଲାଗି ଯାଉଥିବା ବେଳେ ଦୁର୍ଘଟଣାର ଶିକାର ହୋଇଛନ୍ତି । ଘଟଣା ସ୍ଥଳରେ ଦୁଇଜଣଙ୍କର ମୃତ୍ୟୁ ଘଟିଛି । ମୃତକ ଦ୍ୱୟ ହେଲେ ମଞ୍ଜିତ ବେପାରୀ ଓ ସତ୍ୟଜିତ ସରକାର । ଏଭଳି ଏକ ଅଭାବନୀୟ ଘଟଣା ନବରଙ୍ଗପୁର ଜିଲ୍ଲା ଉମରକୋଟ ରାଇଘର ରାସ୍ତାରେ ଘଟିଛି ।
ଖବରମୁତାବକ, ଗତକାଲି ରାତିରେ ୟୁଭି-୧ ବଡକୁମାରୀ ଗ୍ରାମର ମଞ୍ଜିତ ବେପାରୀ ଏବଂ ୟୁଭି-୧୦ ସୁନାଭେଡା ଗ୍ରାମର ସତ୍ୟଜିତ ସରକାର ଦୁହେଁ ଏକ ବାଇକରେ ଦୂର୍ଗାପୂଜା ଦେଖିବା ଲାଗି ବାହାରିଥିଲେ । କିନ୍ତୁ ବିଧିର ବିଧାନ କିଛି ଅଲଗା ଥିଲା । ମା’ଙ୍କୁ ଦର୍ଶନ କରିପାରିନଥିଲେ ମଞ୍ଜିତ ଓ ସତ୍ୟଜିତ । ତାଙ୍କ ବାଇକର ବେଗ ଦୃତ ଥିବାରୁ ଉମରକୋଟ ରାଇଘର ରାସ୍ତାରେ ଥିବା ଏକ ପେଟ୍ରୋଲ ପମ୍ପ ନିକଟରେ ଯାଉଥିବା ଏକ ଟ୍ରକ୍ ପଛରେ ବାଇକ୍ ଟି ସମ୍ପୂର୍ଣ୍ଣ ପସିଯାଇଥିଲା । ଫଳରେ ଦୁହେଁ ଘଟଣା ସ୍ଥଳରେ ମୃତ୍ୟୁବରଣ କରିଥିଲେ ।
