ଭୁବନେଶ୍ୱର(ଏଟିଆର ବ୍ୟୁରୋ): ଦିନ ଦ୍ୱିପ୍ରହରେ ଛାତ୍ରୀଙ୍କୁ ଗୁଳି ମାଡ ଘଟଣାରେ ନୂଆ ମୋଡ ଆସିଛି । କମିଶନରେଟ ପୋଲସର ଛାନଭିନରେ ଜଣାପଡିଛି ଯେ ଯୁବତୀଜଣଙ୍କ ନିଜ ପୁରୁଷ ବନ୍ଧୁଙ୍କ ସହ ବନ୍ଧୁକ ଧରି ଖେଳୁଥିଲେ । ଏହି ସମୟରେ ବନ୍ଧୁକରୁ ଦୁଇ ରାଉଣ୍ଡ ଗୁଳି ଫୁଟି ଯାଇଥିଲା । ଏହି ଘଟଣାର ଖୁଲାସା କରିଛନ୍ତି ଡିସିପି ଅନୁପ ସାହୁ ।
ଏହି ଘଟଣାରେ ଯୁବତୀଙ୍କ ପୁରୁଷ ବନ୍ଧୁଙ୍କୁ ଗିରଫ କରିଛି କମିଶନରେଟ ପୋଲିସ । ଏନେଇ କମିସନରେଟ ପୋଲିସ ଟ୍ୱିଟ ମାଧ୍ୟମରେ ଜଣାଇଛନ୍ତି । ଅଭିଯୁକ୍ତ ଆଶିଷ ନାୟକ ନାଁରେ ପୂର୍ବରୁ ଏକାଧିକ ମାମଲା ରହିଛି । ଆଶିଷଙ୍କ ନାଁରେ ନୟପଲ୍ଲୀ ଅଞ୍ଚଳରେ ଏକ ବୋମା ବିସ୍ଫୋରଣ ମାମଲା ରହିଛି । ଏହି ବୋମା ବିସ୍ଫୋରଣ ମାମଲାରେ ଆଶିଷ ଗିରଫ ହୋଇଥିଲେ ।
ସୂଚନା ଯୋଗ୍ୟ ଗତକାଲି ଜନଗହଳିପୂର୍ଣ୍ଣ ଇନଫୋସିଟି ଅଞ୍ଚଳରେ ଏକ ଘରୋଇ ଇଂଜିନିୟରିଂ କଲେଜରେ ଫ୍ୟାସନ ଡିଜାଇନିଂ କରୁଥିବା ଜଣେ ଯୁବତୀଙ୍କ ଉପରେ ଦୁଇ ଜଣ ଦୁର୍ବୃତ୍ତ ଗୁଳି ମାଡ କରିଥିବା କୁହାଯାଉଥିଲା । ଏହାକୁ ନେଇ ପୋଲିସ ତଦନ୍ତ ଆରମ୍ଭ କରିଥିଲା । ପ୍ରାଥମିକ ତଦନ୍ତରେ ପ୍ରେମ ସମ୍ପର୍କ କୁ ନେଇ ଏଭଳି ଘଟଣା ଘଟିଥାଇ ପାରେ ବୋଲି ପୋଲିସ ସନ୍ଦେହ କରୁଥିଲା ।
