କଟକ ( ଏଟିଆର ବ୍ୟୁରୋ): ଗତକାଲି ରାତିରେ କଟକର ରିଙ୍ଗରୋଡରେ ଏକ ମର୍ମନ୍ତୁଦ ସଡକ ଦୁର୍ଘଟଣା ହୋଇଛି । ଏକ ଦ୍ରୁତଗାମୀ କାର ଏକ ଯାତ୍ରୀବାହି ଅଟୋକୁ ଧକ୍କା ଦେବାରୁ ୭ ଜଣ ଗୁରୁତର ହୋଇଛନ୍ତି । ଖବର ଅନୁସାରେ ଗତକାଲି କ୍ୟାଣ୍ଟେନମେଣ୍ଟ ରୋଡରେ ଏକ ଅଟୋ ୫ ଜଣ ଯାତ୍ରୀଙ୍କୁ ନେଇ ଯାତ୍ରା କରୁଥିବା ବେଳେ ପଛରୁ ଆସୁଥିବା ଏକ ଦ୍ରୁତଗାମୀ କାର ଧକ୍କା ଦେଇଥିଲା । ଫଳରେ ୭ ଜଣ ଗୁରୁତର ଆହତ ହୋଇଛନ୍ତି । ସେମାନଙ୍କୁ ଗୁରୁତର ଅବସ୍ଥାରେ ଉଦ୍ଧାର କରି କଟକ ବଡ ମେଡିକାଲରେ ଭର୍ତ୍ତି କରାଯାଇଛି ।
ଆହତ ମାନଙ୍କ ମଧ୍ୟରେ ୨ ଜଣ ଶିଶୁ ରହିଥିବା ଜଣା ପଡିଛି । ତେବେ ଧକ୍କା ଦେଇଥିବା କାରରେ ପୋଲିସ ଲେଖା ହୋଇଛି । କାରଟି କୌଣସି ପୋଲିସ କର୍ମଚାରୀଙ୍କ ପରିବାରର ବୋଲି ଜଣା ପଡିଛି । ଦୁର୍ଘଟଣା ସମୟରେ କାରରେ ଜଣେ ଯୁବକ ଓ ଜଣେ ଯୁବତୀ ରହିଥିଲେ । ଯୁବକ ଜଣଙ୍କ ମଦ୍ୟପାନ କରି ଗାଡି ଚଳାଉଥିଲେ । ଗାଡିରୁ ମଦ ଜବତ ହୋଇଛି । କାରଟି କଲ୍ୟାଣୀ ନଗରର ଜଣେ ବ୍ୟକ୍ତିଙ୍କର ବୋଲି ପ୍ରାଥମିକ ତଦନ୍ତରୁ ସୂଚନା ମିଳିଛି । କାର ଚଳାଉଥିବା ଯୁବକ ଓ ଯୁବତୀ ମଧ୍ୟ ଗୁରୁତର ଆହତ ହୋଇଛନ୍ତି ।
