ଭୁବନେଶ୍ୱର ( ଏଟିଆର ବ୍ୟୁରୋ): ସବୁ କଳ୍ପନା ଜଳ୍ପନାର ଅନ୍ତ ଘଟାଇ ଆଜି ପାଟକୁରାରେ ବିଜେଡି ତାର ପ୍ରାର୍ଥୀ ଘୋଷଣା କରିଛି । ବିଜେଡି ପାଟକୁରାରେ ସାବିତ୍ରୀ ଅଗ୍ରୱାଲଙ୍କୁ ପ୍ରାର୍ଥୀ କରିଛି । ଗତ ୨୦ ତାରିଖରେ କେନ୍ଦ୍ରାପଡା ଜିଲ୍ଲା ପାଟକୁରା ବିଧାନସଭା ଆସନର ବିଜେଡି ବିଧାୟକ ପ୍ରାର୍ଥୀ ବେଦ ପ୍ରକାଶ ଅଗ୍ରୱାଲଙ୍କ ପରଲୋକ ହୋଇଥିଲା । ଯାହାକୁ ନେଇ ଗତକାଲି ପାଟକୁରାରେ ହେବାକୁ ଥିବା ନିର୍ବାଚନ ବାତିଲ ହୋଇ ଆଗାମୀ ମେ ୧୯ ତାରିଖରେ ଉକ୍ତ ଆସନରେ ମତଦାନ ହେବ ବୋଲି ନିର୍ବାଚନ କମଶନଙ୍କ ପକ୍ଷରୁ ବିଜ୍ଞପ୍ତି ପ୍ରକାଶ ପାଇଥିଲା ।
ତେବେ ଉକ୍ତ ଆସନରେ ବିଜେଡି କାହାକୁ ପ୍ରାର୍ଥୀ କରିବ ତାକୁ ନେଇ ଚାଲିଥିଲା ଅଙ୍କକଷା । ବିଜେଡି ସେଠାରେ ବେଦ ପ୍ରକାଶଙ୍କ ପରିବାରରୁ କାହାକୁ ପ୍ରାର୍ଥୀ କରିବ ବୋଲି ଆଲୋଚନା ମଧ୍ୟ ଜୋର ଧରିଥିଲା । ସେଠାରେ ପୁଅ ସଞ୍ଜୟଙ୍କୁ ଦଳ ଟିକେଟ ଦବ ବୋଲି ହେଉଥିଲା ଚର୍ଚ୍ଚା । ତେବେ ବିଜେଡି ସୁପ୍ରିମୋ ନବୀନ ପଟ୍ଟନାୟକ ଏସବୁ ଉପରୁ ପରଦା ହଟାଇ ବେଦ ପ୍ରକାଶ ଅଗ୍ରୱାଲଙ୍କ ପତ୍ନୀ ସାବିତ୍ରୀ ଅଗ୍ରୱାଲଙ୍କ ନାମ ପ୍ରାର୍ଥୀ ଭାବେ ଘୋଷଣା କରିଛନ୍ତି । ଏନେଇ ନବୀନ ନିବାସରେ ଏକ ସାମ୍ବାଦିକ ସମ୍ମିଳନୀରେ ଏହି ଘୋଷଣା କରାଯାଇଛି । ସୂଚନାଯୋଗ୍ୟ ଯେ ଏଠାରେ କେବଳ ବିଜେଡି ଦଳ ହିଁ ନୂଆ ପ୍ରାର୍ଥୀ ଦେଇପାରିବ ବୋଲି ନିର୍ବାଚନ କମିଶନଙ୍କ ନିର୍ଦେଶ ରହିଥିଲା । ବାକି ଅନ୍ୟ ଦଳ ପକ୍ଷରୁ ଦାଖଲ ହୋଇଥିବା ପ୍ରାର୍ଥୀ ପତ୍ର କାଏମ ରହିଛି ।
