ପୁରୀ (ଏଟିଆର ବ୍ୟୁରୋ) ; ପୁରୀ ଜିଲ୍ଳା ଗୋପାଳପୁର ଗାଁରେ ଦେଖିବାକୁ ମିଳିଛି ଏକ ଅଭାବନୀୟ ଘଟଣା । ଖୋଲା ଡ୍ରେନରେ ପଡି ଜଣେ ନାବାଳକର ମୃତ୍ୟୁ ହୋଇଛି । ମୃତ ନାବାଳକ ଜଣଙ୍କ ହେଲେ ଗଣେଷ ନାୟକ । ଗତକାଲି ସନ୍ଧ୍ୟାରେ ଗଣେଷ ଘରୁ ଚା ଆଣିବା ପାଇଁ ଦୋକାନକୁ ଯାଇଥିଲା ମାତ୍ର ରାତି ହୋଇ ଯାଇଥିଲେ ମଧ୍ୟ ଘରକୁ ଫେରିନଥିଲା । ଘର ଲୋକ ରାତିରେ ସାଇ ପଡିଶା ଏବଂ ଚାରିଆଡେ ଖୋଜା ଖୋଜି କରିଥିଲେ ମଧ୍ୟ ଗଣେଷମିଳିନଥିଲା ।
ଆଜି ସକାଳେ ଡ୍ରେନରେ ଗଣେଷର ଶବ ଭାସୁଥିବା ସ୍ଥାନୀୟ ଲୋକ ଦେଖିବା ପରେ ସାରା ଅଞ୍ଚଳରେ ଶୋକର ଛାୟା ଖେଳିଯାଇଥିଲା । ଖୋଲା ଡ୍ରେନ ପାଇଁ ଜୀବନ ଯାଇଥିବାରୁ ସ୍ଥାନୀୟଲୋକ ଉତ୍ୟକ୍ତ ହୋଇ ପୁରୀ କୋଣାର୍କ ରାସ୍ତାରେ ଟାୟାର ଜାଳି ଅବରୋଧ କରିଥିଲେ । ଗଣେଷର ପରିବାରକୁ କ୍ଷତି ପୂରଣ ଏବଂ ଖୋଲା ଡ୍ରେନକୁ ବନ୍ଦ କରିବା ଦାବିରେ ରାଜରାସ୍ତାକୁ ଓହ୍ଲାଇଥିବା ସ୍ଥାନୀୟ ଲୋକ ପ୍ରକାଶ କରିଛନ୍ତି । ପରେ ଖବର ପାଇ ପୋଲିସ ଘଟଣାସ୍ଥଳରେ ପହଞ୍ଚି ଉତ୍ୟକ୍ତ ଲୋକଙ୍କୁ ବୁଝା ସୁଝା କରିବାକୁ ଚେଷ୍ଟା କରିଛି ।
