କେନ୍ଦ୍ରାପଡା (ଏଟିଆର ବ୍ୟୁରୋ) ; ଯୁବକଙ୍କ ଉପରେ ଛୁରାମାଡ । ଯୁବକଙ୍କ ବେକ,ଗାଲ ଓ ଡାହାଣ କାନ୍ଧରେ ଗଭୀର କ୍ଷତ ହୋଇଛି । ଅଳ୍ପକେ ବତ୍ତି ଯାଇଛନ୍ତି ଯୁବକ । ଆକ୍ରମଣର ଶିକାର ହୋଇଥିବା ଯୁବକ ଜଣଙ୍କ ହେଲେ ତାପସ ବରାଳ । ତାଙ୍କ ଗାଁ ନଗରୀ ପଡା ଗାଁରେ । ତେବେ ମିଳିଥିବା ସୂଚନା ମୁତାବକ ଗୁରୁବାର ତାପସ ଘରକୁ ଫେରୁଥିବା ସମୟରେ ଗାଁର କିଛି ଯୁବକ ଛକ ନିକଟରେ ତାଙ୍କୁ ଅଟକାଇ ଥିଲେ । ପରେ କୈାଣସି ଏକ କଥାକୁ ନେଇ ଉଭୟଙ୍କ ମଧ୍ୟରେ କଥା କଟି ହେବା ଫଳରେ ପାଟିତୁଣ୍ଡ ହୋଇଥିଲା । ପରେ କ୍ରୋଧର ବସବର୍ତ୍ତୀ ହୋଇ ଗାଁର ଯୁବକମାନେ ତାପସଙ୍କ ଉପରକୁ ଛୁରାମାଡ କରିଥିଲେ । ଆକ୍ରମଣରେ ଗୁରୁତର ଆହତ ହୋଇ ଘଟଣାସ୍ଥଳରେ ଟଳି ପଡିଥିଲେ ତାପସ ।
ଛୁରୀଟି ଧାରୁଆ ହୋଇଥିବାରୁ ତାପସଙ୍କ ଦେହରୁ ପ୍ରବଳ ରକ୍ତ ସ୍ରାବ ହୋଇଥିଲା । ଫଳରେ ଅଚେତ ହୋଇପଡିଥିଲେ । ପରେ ସ୍ଥାନୀୟ ଲୋକ ତାପସଙ୍କୁ ଉଦ୍ଦାର କରି ପାଟକୁରା ଗୋଷ୍ଠୀ ସ୍ୱାସ୍ଥ୍ୟ କେନ୍ଦ୍ରରେ ଭର୍ତ୍ତି କରିଥିଲେ । ମାତ୍ର ଦେହରେ ଗୁରୁତର କ୍ଷତ ହୋଇଥିବାରୁ ପାଟକୁରା ଗୋଷ୍ଠୀ ସ୍ୱାସ୍ଥ୍ୟ କେନ୍ଦ୍ରରୁ କଟକ ବଡ ମେଡିକାଲକୁ ସ୍ଥାନାନ୍ତରିତ କରା ଯାଇଥିଲା । ଏବେ ତାପସଙ୍କ ଅବସ୍ଥା ଠିକ ଥିବା ପରିବାର ପକ୍ଷରୁ ସୂଚନା ଦେଇଛନ୍ତି । ତେବେ ଏହି ଘଟଣା ସମ୍ପର୍କରେ ପୋଲିସରେ ତାପସଙ୍କ ପରିବାର ପକ୍ଷରୁ ଏତଲା ଦେବା ପରେ ପାଟକୁରା ପୋଲିସ ଘଟଣା ସ୍ଥଳରେ ପହଁଞ୍ଚି ଛାନଭିନ ଆରମ୍ଭ କରି ଦେଇଛି । ଆକ୍ରମଣ କରିଥିବା ଯୁବକମାନେ ଫେରାର ଥିବା ପୋଲିସ କହିଛନ୍ତି ।
