ଗଞ୍ଜାମ (ଏଟିଆର ବ୍ୟୁରୋ); ଦିନ ଦ୍ୱିପ୍ରହରେ ଯୁବକଙ୍କୁ ଟେକି ନେଲେ । ବୈଦ୍ୟନାଥପୁର ଥାନା ଟାଟାବେଞ୍ଚ ଛକରେ ଦିନ ଦ୍ୱିପ୍ରହରେ ଜଣେ ଯୁବକଙ୍କୁ ୫ରୁ ୭ଜଣ ଆସି ଅଟୋରେ ନେଇ ଫେରାର ହୋଇଯାଇଛନ୍ତି । ତେବେ ଏନେଇ ଥାନାରେ କୌଣସି ଏତଲା ଦିଆଯାଇନାହିଁ । ପୋଲିସ ନିଜ ଆଡୁ ମାମଲା ଦାୟର କରି ଦୁଇ ଜଣଙ୍କୁ ଅଟକ ରଖି ପଚରା ଉଚରା କରୁଛି । ଏଯାବତ ଯୁବକଙ୍କ ପତ୍ତା ମିଳିନାହିଁ ।
ସୋମବାର ଦିନ ଗୋଟାଏ ବେଳେ ରାସ୍ତା ପାର ହେଉଥିବା ଯୁବକଙ୍କ କଲର ଧରି ରାସ୍ତା ଆରପଟକୁ ନେଇ ଅଟୋରେ ନେଇ ଚମ୍ପଟ ମାରିଥିଲେ । ସେଠାରେ ଲୋକ ଦେଖୁଥିଲେ ସୁଦ୍ଧା କେହି କିଛି କହିନଥିଲେ । ପୋଲିସ ଏହି ଖବର ପାଇବା ପରେ ଘଟଣାସ୍ଥଳରେ ପହଁଞ୍ଚିଥିଲା । ସେଠାରେ ଲାଗିଥିବା ସିସିଟିଭି ଯାଞ୍ଚକରିଥିଲା । ଦୁଇ ଜଣଙ୍କୁ ଚିହ୍ନଟ କରିବା ପରେ ସେମାନଙ୍କୁ ଥାନାକୁ ଆଣି ପଚରା ଉଚରା କରୁଛି ପୋଲିସ ।
ଅପହରଣ କରାଯାଇଥିବା ଯୁବକ ଜଣଙ୍କ ଅଟକ ରହିଥିବା ଜଣେ ସାଙ୍ଗର ଭଉଣୀକୁ କମେଣ୍ଟ ମାରିଥିଲେ । ଏବଂ ସବୁବେଳେ ହଇରାଣ କରୁଥିଲେ ବୋଲି ଅଟକ ଯୁବକ ଦ୍ୱୟ କହିଛନ୍ତି । ତେବେ ସେ ଆଗକୁ ଯେଭଳି ଏମିତି ନକରନ୍ତି ସେଥିଲାଗି ବୁଦ୍ଧି ଶିଖାଇବା ପାଇଁ ତାଙ୍କୁ ନେଇଯାଇଥିଲେ । ଚେତାବନୀ ଦେବା ପରେ ପୁଣି ଯୁବକଙ୍କୁ ଆଣି ସେଠାରେ ଛାଡି ଚାଲିଯାଇଥିଲେ ବୋଲି କହିଛନ୍ତି ଅଟକ ଅଭିଯୁକ୍ତଦ୍ୱୟ । କିନ୍ତୁ ଏବେ ସୁଦ୍ଧା ଯୁବକଙ୍କ ପତ୍ତା ମିଳିନାହିଁ । ଥାନାରେ ମଧ୍ୟ କେହି ଏସମ୍ପର୍କରେ ଅଭିଯୋଗ କରି ନାହାଁନ୍ତି ।
