କେନ୍ଦ୍ରାପଡା (ଏଟିଆର ବ୍ୟୁରୋ); ପୁଣି କେନ୍ଦ୍ରାପଡାରେ ଫୁଟିଲା ଗୁଳି । ଗ୍ୟାରେଜକୁ ଗାଡି ସଜାଡିବା ପାଇଁ ଆସିଥିବ ଯୁବକଙ୍କ ଉପରକୁ ଦୁଇ ରାଉଣ୍ଡ ଗୁଳି ଚଳାଇ ଫେରାର ହୋଇଗଲେ ଦୁର୍ବୃତ୍ତ । ତେବେ ଏହି ଗୁଳିକାଣ୍ଡ କିଏ ଏବଂ କାହିଁକି କରିଛି ତାହା ସ୍ପଷ୍ଟ ହୋଇନାହିଁ । ପୋଲିସ ଘଟଣାର ତଦନ୍ତ ଆରମ୍ଭ କରିଛି । ଆହତ ହୋଇଥିବା ଯୁବକ ହେଲେ ପ୍ରସାନ୍ତ ବାରିକ । ତାଙ୍କ ବାମ ଗୋଡରେ ଗୁଳି ବାଜିଛି । ପ୍ରସାନ୍ତଙ୍କୁ କଟକ ବଡ ମେଡିକାଲରେ ଭର୍ତ୍ତି କରାଯାଇଛି । ଏହି ଘଟଣା ପରେ ଗାଁରେ ଉତ୍ତେଜନା ଦେଖା ଦେଇଛି ।
ମିଳିଥିବା ସୂଚନା ମୁତାବକ କେନ୍ଦ୍ରାପଡା ଜିଲ୍ଲା ପାଟକୁରା ଅନ୍ତର୍ଗତ ବଡନୟନପୁର ଛକଠାରେ ପ୍ରସାନ୍ତ ବାଇକ ସଜାଡିବା ପାଇଁ ଗ୍ୟାରେଜକୁ ଆସିଥିଲେ । ମେକାନିକ ଗାଡି ସଜାଡୁଥିବା ସମୟରେ ପ୍ରସାନ୍ତ ତାଙ୍କ ପାଖରେ ଛିଡା ହୋଇଥିଲେ । ହଠାତ ଦୁଇଜଣ ଯୁବକ ବାଇକରେ ଆସିଲେ ଏବଂ କିଛି କହିବା ପୂର୍ବରୁ ଦୁଇ ରାଉଣ୍ଡ ଗୁଳି ଫୁଟାଇ ଫେରାର ହୋଇଯାଇଥିଲେ । ସ୍ଥାନୀୟ ଲୋକ ପ୍ରସାନ୍ତଙ୍କୁ ଉଦ୍ଧାର ପ୍ରଥମେ ତେଣ୍ଡାକୁଡା ମେଡିକାଲରେ ଭର୍ତ୍ତି କରିଥିଲେ । ଏବଂ ପରେ ଅବସ୍ଥା ସଙ୍କଟାପର୍ଣ୍ଣ ହେବାରୁ ତାଙ୍କୁ କଟକ ବଡ ମେଡିକାଲକୁ ସ୍ଥାନାନ୍ତରିତ କରାଯାଇଛି । ଏବେ ସେ ସେଠାରେ ଚିକିତ୍ସିତ ହେଉଛନ୍ତି । ପୋଲିସ ଖବର ପାଇବା ପରେ ଘଟଣାର ତଦନ୍ତ ଆରମ୍ଭ କରିଛି ।
ତେବେ ଦୁର୍ବୃତ୍ତମାନେ ପ୍ରସାନ୍ତଙ୍କ ସହିତ କୌଣସି ପୂର୍ବ ଶତ୍ରୃତା କାରଣରୁ ଗୁଳି ମାଡ କରିଛନ୍ତି କି ଗ୍ୟାରେଜ ଉପରେ ରାଗ ରଖି ଭୁଲସେ ପ୍ରସାନ୍ତଙ୍କୁ ଗୁଳି ମାଡ କରିଛନ୍ତି ତାହା ସ୍ପଷ୍ଠ ହୋଇନାହିଁ । ତେବେ ଏହି ଘଟଣାକୁ ନେଇ ସ୍ଥାନୀୟ ଅଞ୍ଚଳରେ ଚାପା ଉତ୍ତେଜନା ମଧ୍ୟ ଦେଖାଦେଇଥିଲା ।
