ରାଉରକେଲା (ଏଟିଆର ବ୍ୟୁରୋ); ଲୁହା ବୋଝେଇ ଟ୍ରକକୁ ଅଟକାଇ ଲୁଟ କରିବା ପାଇଁ ଜଗି ରହିଥିଲେ ୬ ଜଣ ଲୁଟେରା । ଟ୍ରକକୁ ଦେଖିବା ପରେ ଆଗକୁ ଆସି ଅଟକାଇବା ପାଇଁ ଚେଷ୍ଟା କରିଥିଲେ । ଲୁଟ କରିବା ପାଇଁ ଆସୁଥିବା ଜାଣିବା ପରେ ଡାଇଭର ସେମାନଙ୍କ ଉପରେ ଚଢ଼ାଇ ଦେଇଥିଲା ଟ୍ରକ । ଘଟଣାସ୍ଥଳରେ ଜଣଙ୍କର ମୃତ୍ୟୁ ହୋଇଥିବା ବେଳେ ୩ଜଣ ଆହତ ହୋଇଛନ୍ତି । ଆଉ ୨ଜଣ ଲୁଟେରା ଫେରାର ହୋଇଯାଇଛନ୍ତି । ରାଉରକେଲା ବ୍ରାହ୍ମଣୀ ତରଙ୍ଗ ଥାନା ଅନ୍ତର୍ଗତ ବାଗଡେଗା ଘାଟିରେ ଘଟିଛି ଏଭଳି ଘଟଣା ।
ସୂଚନା ଅନୁଯାୟୀ, ମଙ୍ଗଳବାର ରାତିରେ ୬ଜଣ ଲୁଟେରା ଲୁଟ କରିବା ପାଇଁ ଯୋଜନା କରି ବସିଥିଲେ । ରାତିରେ ଏକ ଲୁହା ବୋଝେଇ ଟ୍ରକ ‘ଜୟ ବାଲାଜୀ ସ୍ପଞ୍ଜ ଆଇରନ’ କାରଖାନାକୁ ସ୍ପଞ୍ଜ ଆଇରନ ଲୋଡ କରି ଦିଲ୍ଲୀର ଗାଜିଆବାଗ ଅଭିମୁଖେ ବାହାରିଥିଲା । ଲୁଟେରାମାନେ ଏହି ଖବର ଜାଣିବା ପରେ ସେମାନେ ଟ୍ରକ ଅଟକାଇ ଲୁଟ କରିବା ପାଇଁ ଛକି ବସିଥିଲେ ।
ସେମାନଙ୍କୁ ଘାଟିରେ ଦେଖିବା ପରେ ଡ୍ରାଇଭର ସତର୍କ ହୋଇଯାଇଥିଲେ । ଗାଡି ଆଗକୁ ଆସୁଥିବା ଲୁଟେରାଙ୍କ ଉପରେ ଚଢ଼ାଇ ଦେଇଥିଲେ ଟ୍ରକ । ଏହି ଘଟଣାରେ ଜଣକ ମୃତ୍ୟୁ ହୋଇଥିବା ବେଳେ ୩ଜଣ ଆହତ ହୋଇଛନ୍ତି । ବାକି ଦୁଇଜଣ ଫେରାର ହୋଇଯାଇଛନ୍ତି । ପୋଲିସ ମୃତ ଦେହକୁ ଉଦ୍ଧାର କରିଛି । ଆହତ ତିନିଜଣଙ୍କୁ ଗିରଫ କରିବା ସହିତ ବାକି ଦୁଇଜଣଙ୍କୁ ଖୋଜଖୋଜି କରୁଛି । ପୋଲିସ ଲୁଟେରାଙ୍କ ତିନୋଟି ବାଇକ ମଧ୍ୟ ଜବତ କରିଛି ।
